سیحون یک

ياسمين عطايي؛ يوزلب بدخشانليك عياللرگه تورلي مهارتلرني تعليم بيريش بيلن اولرگه ايش زمينه سيني مساعد ايتكن

neshananews

10 May 2021

قريب اون ييل دن بيري بدخشان نينگ محلي اينجولريده عياللرگه تعليم بيريب و مهارتلرني اورگتكن خانم سيمين عطايي گه كوره بو مدت ده عياللر تورلي كسب و مهارت لرني اورگتيش بيلن بيرقطار عياللرگه ايش زمينه سيني مساعد ايتكن.
بو ايش يرتوچي خانم بدخشان مركزي فيض آباد شهريده بير قطار تعليمي دستورلرني يولگه قوييب يوزلب عياللرني گليم، قالين توقيش، خياطليك، بكس تيكيش و زغره توقيش كبي مهارتلرني ” پيام بانوان” ناملي موسسه و باشقه اداره لر همكارليگي بيلن تعليم بيرگن. اوني معلوم قيليشيچه حاضرچه تعليم كورگن عياللر رسمي و نارسمي اداره لرده ايشلش بيلن بو مهارتلر آرقلي درامد ايگه سي بوليب عايله لري روزغاريني تامين لشده كتته حصه قوشيب كيلماقده لر.
بانو عطايي ديدي مين و باشقه همكسب لريم عياللر مهارتلريني يوكسلتيريش و ايشلب چيقاره ياتكان اشيالرگه بازار تاپيش ده سعي قيليب و عياللر روليني اقتصادي فعاليت لرده يوكسلتيرماقچي ميز. خانم عطايي علاوه ايتي بو ولايت ده كوپلب عياللر ييترليچه قابليت لرگه ايگه ديرلر اما اجتماعي و مدني عرف و عادتلر و چيكلولرسبب اوز استعدادلريني نمايان ايتيش ده كيركلي فرصت لردن محروم قالگنلر. خانم عطايي نينگ بيلديريشيچه او و باشقه همكسبلري سعي و حركتي بيلن حاضرچه بدخشان مركزي و بير قطار تومنلريده بيرقطار عياللر كسب و فن ايگه سي بوليب و اوز قشلاق و محله لريده باشقه عياللرگه هم درآمد زمينه سيني مساعد ايتكنلر.


خانم عطايي اما هنوز هم عياللر ايشلب چيقاره ياتكان محصولات اوچون ايشانچلي و دايمي بازار يوق ليگي بو قتلم قرشي سيده تورگن اينگ اساسي معما بولگني تي تاكيدلب، عياللر تا اوزلري توغريدن توغري بازارگه باغلنمسه و اوز محصولات لريني مستقل روشده بازارگه ساته آلمسه لر ايش و كسب و كارلري وضعيتي اعلي درجه ده رواجلنيشي ناممكن ديدي.
اونگه كوره اگر عياللر ايشلب چيقارگن اشيالري يانيده اوز محصولاتلريگه بازار تاپيش اوچون سعي و حركت قيلسه لر ، اقتصادي ضرورت لريني تامين لشدن علاوه محل اقتصادي ني قوللب قوتلش و عياللرگه ايش زمينه سيني يرتيش ده تاثيرلي ايشلرني بجره آله ديلر.
بدخشان ده سونگي ييللر جريانيده بيرقطار خلق ارا و ملي موسسه لر عيللر قابليت لريني آشيريش ده ايريم فعاليتلرني بجرگنلر، اما فن و مهارتلرني اورگنگن عياللردن دواملي حمايت لر يوق ليگي سبب سونگي ييللر دواميده بير قطار عياللر اوز اقتصادي فعاليت لريني توختتيش گه مجلور بولكنلر. بانو عطايي علاوه ايتي او عياللر فعاليت لري توختتيليشي آلديني آليش اوچون هر بير منطقه ده عياللردن حمايت ايتيش گروه لرني ايجاد ايتيب و عياللرني بو گروه لرگه قوشيليشي ده ترغيب ايتكن.
اوني معلوم قيليشيچه حاضرچه بدخشان مركزي و تومنلريده گروهي شكل ده ييريك ايشلر جمله دن موسسه لر اوچون نقاب( ماسك ) و مخصوص كييم ايشلب چيقاريش ني باشلگنلر.
خانم عايشه خياطليك و توقمه چيليك بوليمي ده تعليم كورگن قيزلردن بيري دير. او ديدي
او ديدي تعليم كوريب اورگنگن فن و مهارت لر آرقلي عايله ام ضرورتلريني تامين لب و عايله اقتصادي قوللب قوللب قوتلش ده اساسي حصه قوشگنمن.
عايشه علاوه ايتي :” بيز اوتميش ده هيت و نوروز مناسبتي بيلن عايله اعضالريگه كييم تيارلش اوچون اوج مينگ افغاني پول بيررديم اما اوتكن ايككي هيت و نوروز ده برچه عايله ام اعضالريگه اوزيم كييم تيكديم و بو جهت دن يخيشي عايدات قولگه كيريتديم.”
بدخشان افغانستان نينگ ولايت لريدن بيري دير كه ايشسيزليك ميزاني اونده يوقاري دير، نه فقط ايركك لر بلكه يوزلب تعليم كورگن و عالي اوقويورت ني بيتيرگن عياللرهم ايشسيزليك دن قينلماقده. اما دزخشان محلي رسميلري، اهالي ني ايشسيزليك دن قوتقره ياتكان يگانه ايچيم يول، اهاليگه فن و مهارتلرني تعليم بيريش آرقلي ايشسيزلر ميزاني ني كميتيرشي ني تاكيدلب ايش بازاريده كوپراق مسلكي شخصلرني جونتيش ممكن ديديلر.