حادثه لرگه قرشي كورش دولت وزيرليگي معلوماتيگه كوره مملكت ني ١٥ ولايتيده جاري بولگن سوتاشقيني نتيجه سيده حاضرگه قدر ١٩٠ اوزجاني ني قولدن بيريب و ١٧٢ نفر هم ياره لنگن.

حادثه لرگه قرشي كورش دولت وزيري غلام بهالدين جيلاني بوكون (سه شنبه ١٢ سنبله)كابل ده بير خبري كنفرانس ده بو رقملرني اعلان ايتيب بو سوتاشقينلري عاقبتيده ١٠٥٥ يشش اوي بوتكل خراب بولگني و ٢٩٦٠ اوي ايسه خساره كورگني دن خبر بيردي.او، بو رقملر اوزگرماقده ديب ايتكن.

اوتكن هفته سه شنبه كوني پروان ولايتي مركزي چاريكارشهريده آغير ياغينگرچليكلر آرتيدن جاري بولگن سو تاشقني و اوندن سونگ كاپيسا، پنجشير، ميدان وردك، لوگر، كابل، ننگرهار، پكتيا، خوست، نورستان، كنر، پكتيكا، لغمان، باميان و غزني ولايت لريده هم جاري بوليب اوني اثريدن مردم گه تلفات و اهالي و عامه انشعات لرگه آغير خساره لر يتكزيلدي.

جيلاني جنابلري سوتاشقيني دن خساره كورگن عايله لرگه ياردم يتكزيش باسقيچي حقيده ديدي:” حاضرگه قدر سوتاشقيني دن صدمه و خساره كورگن تورت مينگ عايله دن اوچ مينگ دن كوپراق عايله لرگه تيزياردم لر يتكزيلگن و قالگن عايله لرگه ياردم يتكزيش ايشي دوام ايتماقده ديدي.”

ايتيليشيچه بو سوتاشقني باشقه ولايت لردن كوره پروان ولايتي گه كوپراق خساره و تلفات يتكزدي. حادثه لرگه قرشي كورش دولت وزيري پروان ولايتيده هلي هم بوتقرو عملياتي دوام ايتيب باريشي ني تاكيدلب درك سيز يوقالگن كيشيلر عايله لريني ايتيشيچه حاضرگه قدر ١٢ دن ١٥ كيشي دركي نامعلوم دير ديدي.