ملي مدافعه وزيرليگي سرپرستي اسدالله خالد، طالبان نينگ مركزلري، پناهگاه لري و اويلري پاكستان نينگ ميرانشاه، كراچي، لاهور و راولپندي شهرلريده جايلشكن و حاضرگه قدر فعال سقلنگن ديب ايتكن.

ملي مدافعه وزيرليگي سرپرستي بوكون ولسي جرگه عمومي يغينيده، پاكستان ني طالبان گه امن باش پناه بيرگني گه عيبلدي. خالدجنابلري طالبان نينگ مركز و يشش اويلري بو مملكت نينگ تورلي شهرلريده فعال سقلنگن و بو گروه جراحتلنگن جنگچيلري پاكستان توپراقيده دوا لنه دي.

خالدجنابلري ني بو اظهاراتي اونداي بير حالده ايتيلماقده كه تازه ليك ده پاكستان اردو مقاملري، هندوستان، پاكستان دولتي مخالف قوتلريني جهازلنتيريش و تربيه لشده افغانستان توپراقي دن فايده لنيشي ني ادعا قيلگندي. بو ادعا كابل و ينگي دهلي تمانيدن اساس سيز اتلگن.

افغانستان مدافعه وزيرليگي سرپرستي، طالبان گروهي قطر ده دوام ايته ياتكان صلح مذاكره لر ايككي باسقيچي دن سو استفاده قيليب و حاضرگه قدر مملكت ده تينچليك و برقرارليك تامين لنيشي اوچون هيچقنداي اراده اوزيدن كورستمگن ديدي.

او مملكت ده اوروشني يكونلنتيريش اوچون قطر مذاكره لري نتيجه سيگه ايشانچ سيزليك بيلديريب طالبان، امريكا و افغانستان دولتي بيلن مذاكره لر بيلن عيني زمانده اوز نظارت لري آستيده بولگن منطقه لرني كينگيتيريش بيلن نيچه ولايت ني تصرف ايتماقچي ايديلر ديب تاكيدلشدي. اما اوني معلوم قيليشيچه بو گروه عكسينچه اوز حاكميت لري آستيده بولگن

توقيز اولسوال ليك ني قولدن بيرديلر. خالدجنابلري افغانستان ملي اردوسي كيله سي شمسي ييل ده طالبان نينگ عايداتي منبع لريني كيسش بويچه ايشلشي دن خبر بيردي. ملي مدافعه وزيرليگي سرپرستي شونينگ ديك افغانستان دن خارجي قوتلرني تيزاق چيقيب كيتيشي دن ايشانچي سيز بيلديريب حاضرگه قدر خارجي قوتلرني افغانستان بوتكل و توستدن چيقيشي دن هيچقنداي يارقين نشانه كورينمگن ديدي.

خالدجنابلري ايشانچ بيلديره كه اگر خارجي قوتلر بوتكل افغانستان ني ترك ايتسه لر مملكت امنيتي و مدافعوي قوتلري طالبان ني نابود قيليش گه ييترليچه كوچ و بوت گه ايگه ديرلر ديدي. خالدجنابلريگه كوره حاضرچه ٨٠ فايز حربي عملياتلر مملكت حربي لري تمانيدن بجريلماقده.

امريكا جمهور رييسي دونالدترمپ تازه ليكده بو مملكت مدافعه وزيرليگي ده ايريم اوزگريشلرني ايجاد ايتي. اوربو وزيرليك باشيده افغانستلن دن امريكايي حربي ني تيزراق چيقاريليشي گه طرفدار بولگن بير شخص ني تغينلشكن. ترمپ ني بو حركتي، امريكايي قوتلرني افغانستان دن شاشلينچ چيقاريش بويچه جمهور رييس ترمپ تمانيدن ينگي فرمان صادر ايتيليشي احتمالي ني كوپيتيرگن.