اوتكن ٢٤ ساعتده كرونا ويروسي ني يوقتيرگن ٩٥ واقعه رويخط ده آلينگن

عامه ساغليك وزيرليگي اوتكن ٢٤ ساعتده مملكت ده ٩٥ کیشی كرونا ويروسي ني يوقتيرگنی نی اعلان ایتکن.
بو وزيرليك،كرونا ويروسي كونده ليك رقملريني اعلان ايتيب بوكون (سه شنبه ١٣ عقرب) توپلم ٤٥٧ شبهه لي واقعه بو وزيرليك لابراتوارلريده تيكشيريلگني و بو اره دن ٨ ولايت ده ٩٥ ينگي واقعه رويخط ده آلينگني ني تاكيدلشدي.
عامه ساغليك وزيرليگي معلوماتيگه كوره بو مثبت واقعه لردن ٢٧ واقعه سي بلخ و ٢٦ واقعه تخار ده ١٥ واقعه قندهار ده ،٩ واقعه كابل ده، ٨ واقعه كندز ده ، ٧واقعه ننگرهارده و ٣ واقعه هم باميان ده رويخط ده آلينگن.
عيني دمده بو وزيرليك اوتكن ٢٤ ساعتده كرونا ويروسي ني يوقتيرگن ٣ بيمار اوز جاني ني قولدن بيرگني دن خبر بيرگن.
بو ينگي واقعه لر بيلن مملكت ده كرونا ويروسي ني يوقتيرگن لر توپلم ساني ٤۱ مينگ و ٧٢٨ كيشي گه يتكن و بوندن ٣۴ مينگ و ٣٥٥ نفر ساغلگن و بير مينگ و ٥٤٤ كيشي اوز جان لريني قولدن بيرگن.
عيني حالده عامه ساغليك وزيرليگي سرپرستي كرونا ويروسي سونگي كونلرده كوپيگندن خواتير بيلديرگن. احمد جواد عثماني گه كوره سونگي هفته لرده بو ويروس ني يوقتيرگن لر ساني مملكت ده كوپيگن ديب شو جهت دن مملكت يشوچيلري بو ويروس گه چلينمسليك اوچون ماسك دن قوللنيب و ساغليك كي سقلش توصيه لرگه عمل قيليش لريني طلب ايتكن.