جوزجان ولایتی ده کرونا ویروسی گه قرشی کورش کیمسیونی سی قراریگه کوره، شبرغان شهریده قرنطینه نی بیرنچی باسقیچی عملی بولیشی باشلنگن.

محلی رسمیلرنی ایتیشچه شبرغان شهرینی قرنطینه سی عامه ساغلیک ریاستی ، حج اوقاف اداره سی و امنیه قوماندان لیگی هماهنگ لیگی بیلن عملگه آشیریلماقده.

 جوزجان ولایت حاکمی اورین باسری عبدالقادر مالیه بوکون ( شنبه ۲۳ حمل) شبرغان شهریده بیرخبری یغین ده دیدی:« کرونا ویروسی گه قرشی کمیسیون قراریگه اساساٌ بوکون دن باشلب قرنطینه نی بیرنچی باسقیچی باشلندی و دستلب کی حرکت ده تجارتی مارکیت لر، بزازلیک راسته سی، لیلامی فروشلیک دوکان لرو آذوقه ساتمه یاتکان برچه دوکان لرنی یاپدیک.» مالیه جنابلری علاوه ایتی:«شبرغان شهری قرنطینه سی نی اوچ باسقیچی بار و ایککنچی باسقیچده دستفروش لر و بازار یوزیده ایشله یاتکان شخصلرنی قرنطینه قیلماقچی میز.» جوزجان ولایت حاکمی سوزچی سی هم قتنشکن بو خبری یغین ده، شهرنینگ اوچنچی باسقیچی قندای عملی بولیشی دن بیران نرسه ایتمه دی.

 عینی حالده، شبرغان شهری قرنطینه بولیشی بیرقطاراهالی تمانیدن آلقیشلنگن، اما دوکاندارلر، کرایه لرنی تولش موضوع سی دن تشویش ده ایکن لیک لرینی معلوم قیلگن لر. عیاللرکافه سی ایگه سی ملالی مبارز بوحقده دیدی:« مین قرنطینه نی آلقیشلی من و اهالیگه معلومات بیریش پروسه سیده حکومت بیلن همکارلیک قیله من اما دولت دوکان لر کرایه سی موضوع سینی آیدین لشتیریشی لازم.» قرنطینه نی سونگی کونی گه چه کافه سی باغلینیشی شرط بولگن خانم مبارز دیدی:« دولت مارکیت لر و دوکان لر ایگه لری بیلن بوباره ده صحبت لشیب اولردن قرنطینه کونلری کرایه سی نی دوکاندارلردن آلمس لیگی نی طلب ایتیشی کیرک.»

 قرنطینه کونلریده کرایه آلینمسلیگی، حاضرگه قدر مملکت بویلب حل بولمی قالگن موضوع دیر. هرچند دوکاندارلرمملکت نینگ اکثرشهرلریده قرنطینه کونلریده دوکانلری کرایه بغیشلنیشی نی طلب ایتماقده لر اما دولت بوخصوص ده حاضرگه قدر هیچقندای مناسبت کورستمگن. کابل، هرات و ننگرهارده بیرقطار مارکیت و دوکان لر ایگه لری قرنطینه اجرا ایتیلگنی دن سونگ بیرآی لیک کرایه نی دوکاندارلردن آلمسلیگ لرینی اعلان ایتیب، بو حرکت، دوکاندارلر تمانیدن آلقیشلندی اما شبرغان شهریده مارکیت لر و دوکان لر ایگه لری حاضرگه قدر بو باره ده بیران نرسه ایتمگن لر.

شبرغان شهری، قرنطینه نینگ بیرینچی باسقیچی نی اوندای حالده تجربه قیلماقده که حاضرگه قدر بو ولایت ده کرونا ویروسی نینگ یوقتیرگن هیچ بیرمثبت واقعه رویخط ده آلینمگن. اما جوزجان عامه ساغلیک اداره سی مسوللری شبرغان شهریده ایجاد ایتیلگن کرونا ویروسی گه اجرتیلگن شفاخانه ده بوویروس نی یوقتیریش گه شبهه لی بولگن سکیزکیشی سخلنیشی دن خبربیریب اما حاضرگه قدر بوشخصلرنینگ نمونه لری نتیجه سی معلوم بولمگن دیب ایتماقده لر.

 باشقه تماندن، دولت یقین لیکده جوزجان ولایتی ده کرونا ویروسی گه قرشی کورش اوچون ۲۰ میلیون افغانی بودجه اجرتیلگنی نی اعلان ایتکن. جوزجان محلی رسمیلری بو مبلغ جوزجان مستوفیت اداره سی حسابی گه یتیب کیلگنی نی تصدیق لشکن لر.