اختلاس ادعاسی : جوزجان ده کرونا گه قرشی کورشده ۲۰ میلیون افغانی قندای صرفلندی؟
neshananews
15 June 2020بوندن قریب اوچ آی آلدین مرکزی حکومت بلخ، جوزجان ، سرپل، سمنگان و وفاریاب ولایت لریگه کرونا ویروسی گه قرشی کورشده ۱۶۰ میلیون افغانی مبلغ اجرتدی . بوندن جوزجان ولایتی نی حصه سی ۲۰ میلیون افغانی بولدی.بو مبلغ کرونا ویروسی بحرانی دن کیلیب چیققن فوق العاده حالت ده، حاجتمند عایله لرگه یاردم کورستیش، کووید ۱۹ شفاخانه سیگه کیرک بولگن طبی اسباب اسکونه لرنی ساتیب آلیش و کرونا ویروسی خطرلریدن اهالی معلومات لرینی یوکسلتیریش اوچون مردم گه معلومات یتکزیش بولیم لریده صرفلنشی کیرک ایدی. بو مبلغ صرفلنیشی مسولیتی کرونا ویروسی گه قرشی کورش کمیته سی صلاحیتی دن ایدی، حاضر که بو مبلغ کتته قسمی صرفلنگن بو ولایت مدنی جماعه سی اعضالری بو مبلغ صرفلنیشی دن اختلاس بولگن دیب ادعا قیلماقده لر.
شرطنامه لرنینگ شفاف بولمگنی، بیمارلراوچون ساتیب آلینگن چپرکتلرده اختلاس، حاجتمند عایله لرگه ییملیک اشیالر ترقتیلمس لیگی و ولایت یشوچیلریگه ییترلیچه معلومات یتکزیلمس لیگی جوزجان مدمنی فعاللری نینگ اینگ مهم ادعالری جمله سیدن دیر. جوزجان مدنی فعاللریدن بولگن سیدرسول سادات نشاانه خبرآژانسی بیلن صحبت ده دیدی:« مردم گه معلومات یتکزیش اوچون ۱۴ نقلیه واسطه نی شرطنامه سیده اختلاس، اوچ دانه فلش کارت ساتیب آلینیشی ده اختلاس و شونینگ دیک اوچ مینگ عایله گه ییملیک اشیالرترقتیلیشی بویچه شفافیت یوق لیگی بو اختلاس لرجمله سیدن دیر که مدنی فعاللر، بو خصوص ده حکومت مسوللری تمانیدن جواب تاپیش نی ایستی دیلر.»
سادات جنابلری علاوه ایتی امضالنگن شرطنامه گه اساسا” جوزجان مرکزی و اولسوال لیک لریده مردم گه معلومات یتکزیش مقصدیده ۱۴ نقلیه واسطه کرایه آلینگندی ، هر موترنینگ بیرآی لیک کرایه سی ۴۲ مینگ افغانی تعین بولگندی .بو آره دن سکیز موتر لادسپیکرلر بیلن تومن لرگه جونتیلیشی لازم ایدی .
سادات جنابلری دیدی مدنی جماعه اعضالری قول تاپکن راپورلرگه اساسا” هیچ بیرموتر اولسوال لیک لرگه جونتیلمگن. او شونینگ دیک بو ولایت ده اوچ مینگ عایله گه ییملیک اشیالرترقتیلیشی ریجه لنگندی اما کرونا ویروسی اوچ آلگن کونلرده فقط ۱۲۰ عایله گه ییملیک اشیالرترقتیلدی. سادات جنابلریگه کوره جوزجان ولایتی نینگ کرونا ویروسی گه قرشی کورش کمیته سی اوچ دانه فلش میموری ساتیب آلگن وموجود سندلرگه بنا” هر فلش میموری بیش مینگ افغانی ساتیب الینگن حالانکه بازارده هرفلش میموری نرخی اوچ یوز افغانی دن کوپ ایمس.
جوزجان ولایتی مدنی فعاللری، کرونا ویروسی گه قرشی کورش کمیته سی حاضرگه قدر بو ۲۰ میلیون افغانی قندای صرفلنگنی دن راپور بیرمگن. اونگه کوره اگر محلی حکومت و کرونا ویروسی گه قرشی کورش کمیته سی بو ۲۰ میلیون افغانی قندای صرفلنگنی دن به تفصیل راپور بیرمسه جوزجان مدنی فعاللری دادخواهلیک قیلیب و اعتراضلی نمایشلرنی یولگه قویماقچی دیدی.
جوزجان ولایتی مدنی فعاللر ترماقی و یاشلر پارلمانی نینگ اعضاسی محمدبشیرفروغ جوزجان ولایتی کووید۱۹ شفاخانه سی اوچون ساتیب آلینگن چپرکت لرحقیده دیدی:« کروناویروسی گه قرشی کورش کمیته سی نینگ تامینات بولیمی بیرینچی بار ۶۰ پایه چپرکت ساتیب آلیش اوچون ۱۰ کمپنی اشتراککی بیلک کیم آچیدی سودا نی یولگه قویدی و هر پایه چپرکت نی ۱۱ افغانی ساتیب آلدی اما اوچ کون دن سونگ ۵۰ پایه چپرکت نی ساتیب آلیش اوچون اوچ کمپنی آره سیده کیم آچیدی سودا یولگه قویلدی بو کیم آچیدی سودا جریانیده هرپایه چپرکت ۲۸ مینگ افغانی ساتیب آلیندی.» فروغ جنابلری چپرکت لر نرخی بویچه بو آشکار فرق نی سوال توغدیریوچی اتب کرونا ویروسی گه قرشی کورش کمیته سیدن بو توغریده مردم گه جواب بیریشی نی ایستیدی.
عینی حالده جوزجان ولایتی مدنی جماعه سی نمانیده سی حسیب الله رحمانی که کرونا ویروسی گه قرشی کورش کمیته سی اعضاسی دیر بو شرطنامه لر باره سی ده نشانه خبرآژانسی بیلن صحبت ده دیدی نظارت کمیته سی یالغیز ساتیب آلینگن اشیالرصفت و کیفیتی نی تیکشیره دی و نرخ لربویچه ارلشمگن. رحمانی جنابلری علاوه ایتی نظارت جریانیده بو کمیته نیچه بارصفت سیز اشیالرنی مسترد قیلدی. او دیدی شو سبب دن هیچ وقت بو کمیته گه اختلاس بیلن یوزمه یوز بولمگن، اما او ساتیب آلینگن اشیالر جریانیده اختلاس یوزبیرگنی نی رد ایتمیدی. اونگه کوره بعضی اشیالرنی ساتیب آلینیشی ده صلاحیت لردن سواستفاده بولگنی ممکن اما نظارتی کمیته سی کوزیدن یاشیریلمیدی.
جوزجان مدنی فعاللریگه کوره کرونا ویروسی گه قرشی کورش کمیته سیده مدنی جماعه نماینده سی ننیگ رولی سمبللیک دیرو تامینات بویچه اولرنینگ نماینده سی نی صلاحیتی یوق ونظارت کمیته سی اعضالرینی ایتیشیچه ، بو کمیته ۳۰۰ دانه ( ۴ جی بی ) لی فلش نی هر بیری نی اوچ یوز افغانی گه ساتیب آلگن ، کیمته بو فلش میموری لرنی مسجد لرملاامام لریگه ترقت ماقچی ایدی. نشانه خبرآژانسی خبرنگاری بو فلش لر ملا امام لرگه ترقتیلیش دن ایشانچ حاصل قیلیش اوچون شبرغان شهری تورت ناحیه سیده‌گی مسجد لرگه مراجعه ایتکن . ملاامام لرنی ایتشیچه اوچ مسجد ده مردم گه معلومات یتکزیش ایشی بجریلگن و فقط بیر مسجد ملاامامی (۲ جی بی ) لی فلش قولگه کیرتکنی نی تصدیق لشکن . شبرغان شهری ایککنچی ناحیه سی « شاه میرزا» مسجدی ملاامامی بو فلیش نی قول گه کیریتکنی اما فعال ایمس لیگی نی ایتکن.
باشقه تماندن جوزجان ولایت حاکم لیگی سرپرستی و کرونا ویروسی گه قرشی کورش کمیته ریسی عبدالقادر مالیه جوزجان مدنی فعاللری ادعالرینی اساس سیزاته‌گن. مالیه جنابلری نشانه خبرآژانسی گه دیدی:« جوزجان ولایتی عدلیه ریاسیتی راپورلریگه کوره بو ولایت ده قانونی باشقیچ نی اوتکزیب حجت لر توغری بولگن مدنی ارگان لر موجود ایمس. اما ینه هم بیز جوزجان ولایتی یشوچیلریگه ۲۰ میلیون افغانی قندای صرفلنیشی دن بیز راپور بیریش ده حاضر میز.»
مالیه جنابلری علاوه ایتی ولایت حاکم لیگی دفتریده کرونا ویروسی گه قرشی کورش کمیته سی تمانیدن ساتیب آلینگن برچه اشیالر سندلری موجود دیرو هر گروه ایسته سی بیزاولر سواللریگه جواب بیریش ده حاضرمیز.
جوزجان ولایت حاکمی سرپرستی چپرکت لر شرطنامه سی باره سیده دیدی چپرکت لرنرخی ده‌گی فرق لر چپرکتلر صفت و کیفیتی گه تیگیشلی ئیر. اونگه کوره ۶۰ پایه چپرکت بیر ایچکی کمپنی دن و ۵۰ پایه صفت لی چپرکت بیر خارجی کمپنی دن ساتیب آلینگن. مالیه جنابلری عاوه ایتی ایچکی کمپنی دن ساتیب آلینگن هر چپرکت نرخی ۱۳ مینگ افغانی دیر اما خارجی کمپنی دن ساتیب آلینگن چپرکتلر نرخی ۲۸ مینگ افغانی دیر.
مالیه جنابلری کرونا ویروسی گه قرشی کورش کمیته سی قراریگه مطابق کرونا ویروسی نی یوقتیرگن یا شبهه لی بولگن هر بیر عایله گه قرنطینه کونلریده بیر بوچی بوغدای، بیربوچی برنچ و بیرقوطی یاغ ترقتیلگنی نی ایتیب توپلم اوچ مینگ عایله گه بو یاردم لر ترقتیلگنی نی تاکیدلشدی.
جوزجان ولایت حاکم لیگی سرپرستی حاجتمند عایله لرگه ییم لیک اشیا لرترقتیلشی کیچ گه قالگنی باره سیده ایتی حاضرگه قدر ۲۵۰ عایله گه بو کمک لر ترقتیلگن و هرزمانی که عامه ساغلیک اداره سی تمانیدن کمک بوله یاتکان عایله لر لیستی بیزگه یتیب کیلسه اولرگه هم یاردم بوله دی دیدی.
مالیه جنابلری شونینگ دیک جوزجان ولایتی بیرقطار مدنی فعاللرینی پاره ایستش گه عیبلب بو مدنی فعاللردن بیرقنچه سی اولرگه هم ییملیک اشیالرترقتیلشی نی طلب ایتکن دیدی ، اما ولایت حاکمی اورین باسری صفتیده هرکیم گه آذوقه و ییملیک اشیا ترقتیش گه صلاحیتی یوق دیدی. مالیه جنابلری بو خصوص ده هیچ کیم آتی نی تیلگه آلمدی.
مالیه جنابلری اوز صحبت لری دوامیده، فلیش میموری موضوع سینی ایزلش دن وعده بیریب و اگر بو توغریده اختلاس بولگن بولسه موضوع نی تیگیشلی ارگان لربیلن شریک قیلیشی دن سوز بیردی.
جوزجان ولایت حاکم لیگی سرپرستی اهالی گه معلومات یتکزیش کمیته سی گه موتر، لادسپیکر و باشقه کیرک اشیالراختیاریلگه قویلگن اما اگر بو توغریده دقت سیزلیک بولگن بولسه اونی عامللرینی عدلی و قضایی ارگان لرگه تانیشتیریشی نی هم تاکیدلشدی.
جوزجان ولایتی کرونا ویروسی گه قرشی کورش کمیته سی سونگی راپوریگه کوره بو ولایت گه اجرتیلگن ۲۰میلیون افغانی دن بوکون گه قدر(دوشنبه ۲۵ جوزا) ۱۹ میلیون و ۸ یوز و ۵۶ مینگ ۴۹۱ افغانی صرفلنگن. بو مبلغ دن کوپراقی طبی اسباب اسکونه لر، ییم لیک اشیا و جوزجان مرکزی و تومن لری یشوچیلریگه معلومات یتکزیش بویچه صرفلنگن. بو مبلغ دن فقط ۱۴۳ مینگ ۸۴۱ افغانی بو کمیته نزدیده موجود دیر.
باشقه تماندن جوزجان ولایتی ده کون اوتیشی بیلن کرونا ویروسی نی یوقتیرگن لرسانی آرتیب بارماقده. جوزجان ولایتی عامه ساغلیک اداره سی رقم لریگه کوره بو ولایت ده کرونا ویروسی نی یوقتیرگنلر سانی ۱۹۴ کیشی گه یتیب بارگن. بو آره دن ۷۳ کیشی قیته ساغلگن و بیش بیمارهم اوزجانی نی قولدن بیرگن.
