افغانستان ده گي اوروش احتمال بوكون يا ايرته يكونلنسه، اما مردم نينگ جسم و ذهني بو اوروش نينگ درد و قيغولي ميراثي بيلن ييل لرچه و احتمال هم نسل لرچه كورشيشي ممكن.

عسكر صفتيده خذمت قيله ياتگان مرتضي نينگ بدني ده گي١٣ چره، بو اولكه ياشلري باشيگه توشكن حكايت لردن بيري دير. بو ياشلر صلح وتينچليك كيليشوي ني آلقيشلب اما ملت لري اولرني اونوتمسليگي ني ايستي ديلر، چونكه بو اولكه آسانليك و ارزانليك بيلن بو اورون گه ايريشمگن.

افغانستان ده كوپلب ياشلر بار كه اوروش و توقنشو اولرني كسل ليك بستريده ياتيش گه مجبورلشكن و اولرنينگ كوزي او قوللرده تيكيلگن كه ويلچرلريني نيچه قدم آلغه سورسه.

اما كونده ليك ايشلري ميز سبب، بيزلردن اكثريتي ميزني اطرافي ميزده گي واقعه لرگه حتي باقيش گه هم فرصت قيلمي ميز، گاهي اونوته ميزكه بو شهرنينگ آسماني آستيده اونداي بير ياشلر نفس تارتيشه ديلر كه نيچه كون آلدين گه چه عشق و تويغو دن توله عزم بيلن بيزدن مدافعه ايتيش اوچون كورشردي و اما بوگون قامت لريني دشمن اوقي خم قيلگن.

بيرينچي خط ده سكيز ييل كورش
مرتضي بوكون لر اوتيز ياشني تولديرماقده. او ياتقيزيلگن تخت اوستيده قيينت ليك بيلن قيميردي.

او پوليس قوتلري نينگ خاص قطعه سي عضوي ايدي و اوروش جريانيده جراحت كوردي و بو جراحت لر اوني قيته اياغ اوستيگه توختتش قابليتي ني اوندن آلدي.

مرتضي ايككي ييل دن بيري طالبان تمانيدن اوروش جريانيده تشلكن قول بامبه نينگ ١٣ چره سي بيلن يولداش بوليب يشب كيلماقده.

ايككي ييل آلدين سنگرداش لري بيلن فراه ولايتي نينگ ناتينچ بولگن پشت رود تومنيده وظيفه بجريش چاغيده طالبان هجومي گه دوچ كيلدي.

اوروش نينگ ايلك دقيقه لريده بيلي دن جراحت آلگن مرتضي سنگرداشلريدن بيش كيشي بيلن بيرگه بير تام گه پناه آلدي.

اوشه لحظه ده جاني قوتقريش اوچون كورش ده اوني دعوت ايته ياتگان يگانه اميدي تورموش اورتاقي و ايككي باله سي ديداري ايدي اما توستدن آلينگن تماس همه نرسه ني بوزدي.

توستدن آلينگ تماس دن امان
مرتضي و بيش سنگرداشي فعاليت قيله ياتگان قرارگاه گه قرشي طالبان هجومي پيتيده او سنگرداشلري بيلن بيرتام گه پناه آليشگه مجبور بولدي اما شو پيتده توستدن آلينگن تماس بو محل ني فاش ايتي.

مرتضي ني ايتيشيچه سنگرداشلريدن بيري بيلن آلينگن تلفني تماس، اولر ياشينگن محل ني فاش ايتي.طالبان، مرتضي و سنگرداشلريني تسليم بوليشگه نيچه بار آگاهلنتيره دي اما اولرنينگ مقاومتي دوام ايتكني سبب طالبان تامگه قول بامبه تشله دي.

مرتضي گه كوره بامبه پارتلش دن سونگ بير اياغي سيندي و سنگرداشلريدن ايككي كيشي جان لريني قولدن بيردي.

نهايت ده طالبان او و اوني نيم جان سنگرداشلريني توتقين ده الديلر، اولر نيچه كوندن سونگ محلي آقسقال لر سعي و حركتي بيلن قويب يوباريلديلر.

مرتضي پوليس صفيده بولگنيده لمري ساتنمن درجه سيگه چه يتيب بارگندي و بو اوروش دن آلدين هم هرات ولايتي ني زيركوه منطقه سيده جراحت كورگندي.

اوني بدني نينگ تورلي جايلريده بامبه چره لري بار اما او اوز اولكه سي اوچون فداكارليك قيلگني دن خرسند ليكن دايمي تينچليك اوني اينگ كتته آرزوسي دير.

اگر بو تينچليك تامين لنسه،شبهه سيز بو صلح ايسه افغانستان سان سيز ياشلري نينگ ناگرانليك و جانفدا ليك لري محصولي دير.