جهان ساغليك تشكيلاتي ني بدخشان ده گي مسول لريني ايتيشيچه بو ولايت نينگ اوزاق توشكن و تاغليك اولسوال ليك لريده هوا ساوغليگي و يوللر ياپيق ليگي اوچون بيش ياش دن پس باله لركه پوليو واكسيني تطبيق ايتيلمي دي.

جهان ساغليك تشكيلاتي ني بدخشان ده گي مسولي اسدالله نعيمي بوتشكيلات بدخشان ده هر ييلي و هر باسقيچ ده ٢٨٥ مينگ باله گه پوليو واكسيني ني تطبيق ايترديلر اما بو فوق العاده دورده بيش ياش ني تولديرمگن ٧٥ باله واكسين دن قالگن ديب ايتي.

اونگه كوره بو كمپاين ده ١٩ اولسوال ليك ده ٢١٠ مينگ دن كوبراق باله گه پوليو واكسيني تطبيق ايتيله دي و  باشقه ٩ تومن يعني ايمي، نسي، شكي، كوفاب، خواهان، شغنان، راغستان و كوهستان ده بو تشكيلات پوليو واكسيني تطبيق ايتيش ده قادر ايمس ديب تاكيدلشكن.

بدخشان عامه ساغليك اداره سي ريسي محمدنور خاوري هم بو فوق العاده كمپاين عامه ساغليك وزيرليگي تمانيدن خطر آستيده بولگن ولايت لرده تطبيق ايتيله دي ديگن.

بدخشان عامه ساغليك اداره سيگه كوره ١٤ ييل دن بويان بو ولايت ده پوليو واكسيني تطبيق ايتيلگني اوچون بو ولايت پوليودن تازه لنگن اما بو كسل ليك ويروسي بغلان ولايتي و بدخشان بيلن چيگره داش بولگن پاكستان مملكتي دن بوقالمگني اوچون بو ولايت خطر آستيده بولگن ولايت لر جمله سيدن بولگن.

اوني معلوم قيليشيچه بير مثبت واقعه بغلان ولايتي ده تاپيلگني و بو ويروس ناتينچليك لر سبب گردش گه بولگني گه قرگنده بدخشان ولايتي خطر آستيده بولگن.

خاوري جناب لري هوا بير آز ايسيغ بوليشي و يول لر ترافيك يوزيده آچيليشي بيلن بو كمپاين بو ٩ تومن ده تطبيق ايتيليشي ريجه لنگن ديدي.

بدخشان عامه ساغليك اداره سي مسول لري هرچند بو ولايت ده اون ييل دن بيري پوليوني مثبت واقعه سي كوزتيلمگن ديب اما بدخشان، پاكستان بيلن چيگره داش بولگني گه قرگنده بو ويروس خطري بيلن يوز مه يوز دير ديب تاكيد لشكن.

بدخشان محلي رسميلري گه كوره پوليو ويروسي دايم گردش گه دير و چيگره حدودلريده اهالي نينگ قتنشي گه قرگنده محلي رسميلر بو كمپاين ني بوتون بدخشان ده تطبيق ايتيش ده سعي قيله ديلر.