بدخشان ولايتي محلي رسمي لري، بو ولايت ده طالبان جنگچي لر ي هجومي نتيجه سيده جرم تومني نينگ بيرقطار قشلاق لري طالبان نظارتي گه اوتكني دن خبر بيرگن.

محلي رسميلر عيني دمده بو هجوملر عاقبتيده امنيتي قوت لرگه تلفات يتكزيلگني ايتكن.

 بدخشان ولايت حاكمي سوزلوچي سي نيك محمد نظري نشانه خبر آژانسي بيلن شنبه ٩ حمل كوني صحبت لشيب طالبان قوراللي لري اوتكن كيچه جرم تومني ده امنيتي قوتلر پوسته لريگه قرشي هجوم لريني شدت بيريب و نيچه ساعت دوام ايتكن توقنشو دن كين امنيتي قوتلر پوسته لريني باسيب آليشكن ديدي.

نظري جنابلريني ايتيشيچه بو توقنشولر عاقبتيده امنيتي قوتلر و طالبان جنگچي لريگه تلفات يتكزيلگن اما تلفات لر رقمي ني ايتيش دن واز كيچدي.

 اوني معلوم قيليشيچه امنيتي قوتلر تلفات آلدي آلينيشي اوچون تكتيكي روشده آرقه گه چيكينگن اما قولدن بيرگن منظقه لرني قيته طالبان نظارتي دن چيقاريش اوچون سعي و حركت لر باشلنگن ديدي.

عيني حالده بدخشان امنيه قوماندان ليگي سوزچي سي ثناالله روحاني ديدي طالبان گروهي محلي اردو گه تيگيشلي بولگن ايككي پوسته ني تصرف ايتيب برچه عسكرلر و حربي اسباب اسكونه لرني آليب كيتگن.

روحاني جنابلريگه كوره محلي اردو قوتلريدن ٣٠ عسكر ني طالبان اسير آلگن و حاضرگه قدر اولرنينگ تقديري دن انيق خبر قولگه ايمس.

باشقه تماندن بدخشان ولايت كينگاشي اعضاسي عبدالله ناجي نظري، بدخشان نينگ جرم تومني گه قرشي طالبان نيچه استقامت دن هجوم اويشتيريب ” دهن آب خستك”، “فرغاميرو”، ” آب راغك”، ” پل سوچ” و باشقه بير قطار كيچيك قشلاق لرني تصرف ايتكن ديب ايتي.

بدخشان ولايت كينگاشي نينگ بو اعضاسيگه كوره امنيتي قوتلر و طالبان ارا يوز بيرگن قتيغ جنگ عاقبتيده امنيتي قوتلردن سكيزكيشي اولديريليب ايككي هاموي تانك،ايككي رنجر، و نيچه پوسته نينگ قورال يراق لري طالبان قوليگه توشكن.

نظري جنابلري شونينگ ديك طالبان قوراللي لري يمگان تومني يولي ني باغله گني دن هم خبر بيريب اگر محل ده ياردمچي قوتلر جونتيلمسه يمگان تومني طالبان نظارتي گه اوتيشي دن آگاهلنتيردي.

 بدخشان ولايت حاكمي سوزچي سي نيك محمد نظري طالبان تمانيدن باسيب آلينگن پوسته لر قيته آلينيشي دن ايشانچ بيلديريب امنيتي قوتلر منطقه ده موجود ايكني و ياردمچي قوتلر يتيب باريشي بيلن تازه لش عمليات يولگه قويليشي ني تاكيد لشدي.

جرم، طالبان اوچون بدخشان ولايتي نينگ استراتيژيك اولسوال ليك لريدن بوليب اوني ايريم قسملري انچه ييللردن بيري طالبان تظارتي آستيده دير.

اوتكن ييلي بومنطقه ده تازه لش عمليات لر يولگه قويلگني طفيلي جرم تومني نينگ كوپلب حدودلري طالبان نظارتي دن چيقاريلدي ليكن بو گروه كتته هجوملرني يولگه قويب قولدن بيركن بعضي حدودلرني قيته تصرف ايتكندي.

 جرم تومني اوتكن نيچه ييل دن بيري امنيتي قوتلر و طالبان جنگچي لري ارا قانلي توقنشولرگه گواه دير.

 صلح مذاكره لري سرعت آليشي بيلن بو منطقه ده زوروانليك لر كميشي دن اميدلر كوپيگن دي اما بدخشان محلي رسميلريگه كوره امريكا و طالبان ارا امضالنگن صلح كيليشوي دن سونگ طالبان هجوملري بو ولايت حدوديده اوتميش دن كوره كوپراق بولگن.