جوزجان ولايتي ده امنيتي قوتلر تمانيدن يولگه قويلگن حربي عمليات ده جوزجان-بلخ شاه بولي حدوديده جايلشكن اينگ استراتيژيك اهميت گه ايگه بولگن شاه ميرزا منطقه سي قوراللي طالبان دن تازه لندي.

شاهين قول اردوسي سوزلوچي سي محمد حنيف رضايي بو خبرني تصديق لب نشانه خبر آژانسي بيلن صحبت ده شاه ميرزا منطقه سي قوراللي طالبان نينگ، باج آلوچي مركزي ايدي، بو مركز شاهين قول اردو سي تمانيدن يولگه قويلگن عمليات عاقبتيده نابود قيلنيدي ديدي.

شاه ميرزا جوزجان ولايتي نينگ خانقاه اولسوال ليگي گه تعلق لي و آقينه بندري يولي اوستيده جايلشكن. طالبان بو منطقه ده اوتكن بير ييل دن بيري بو يولده قتنه ياتگان يوك و نفت تاشوچي نقيله واسطه لردن باج آليب كتته درآمد كسب ايترديلر،

اوتكن آلتي آي جريانيده بو منطقه نيچه مراتبه يير و هوا آرقلي يولگه قويلگن عملياتلر عاقبتيده طالبان دن تازه لنگندي.

جوزجان ولايت حاكمي سوزلوچي سي عبدالمعروف آذر ، شاه ميرزا منطقه سي طالبان دن تازه لنگني بيلن ايككي قشلاق هم طالبان نظارتي دن چيقاريلگني ني تصديق لشدي.

بو محل تازه لنگن دن آلدين يوك و نفت تاشوچي نقليه واسطه لر منطقه دن اوتيب قيتيش اوچون طالبان گه پول بيريشگه مجبور ايديلر ديدي.

اندخوي- مزار يوليده هركوني قتنه ياتگان بير تاكسي هيدوچي سي بو منطقه ده كوزي بيلن كورگن وضعيت دن بونداي معلومات بيردي: ” طالبان تاكسي موترلردن پول آلمسدي، اما اگر يوك و نفت تاشوچي نقليه واسطه لر طالبان چك پاينتي ده توختته مسه طالبان اولرني نشان گه توتردي”.

بو هيدوچي گه كوره هركوني بو منطقه دن يوزلرچه نفت تاشوچي موتر قتنردي و طالبان هر موتردن ٣٠مينگ افغاني پول آلردي ، اورتچه حساب ده طالبان هركوني بو منطقه دن اوچ ميايون افغاني در امد كسب ايتردي.

اوتميش ده بو منطقه ده طالبان ايككي تانكرني اوتگه يانديرگندي و هلي هم اوني نشانه لري محل ده كورنيب تورگن.

شبرغان يشوچي سي سمير كامبخش بو منطقه تازه لنگي دن خرسندليك بيلديريب ، اوتميش ده بو منطقه دن سفر قيلماقچي بولگني ميزده شاه ميرزا منطقه سي ني پل صراط گه اوخشترديك و كوپ خوف و تشويش بيلن بو منطقه دن اوتيب قيترديك، اما ايندي عمليات بولگني دن سونگ خوفسيز اوتيب قيته ميز ديب ايتي.

اوچ كوندن آلدين يير و هوا قوتلري قتنشكن خالد عمومي عملياتي دايره سيده شاهين ٢٢٠ ناملنگن حربي عمليات باشلنيب حاضرهم دوام ايتماقده.

طالبان حاضرگه قدر شاه ميزرا منطقه سي بو گروه نظارتي دن چيقاريلگني حقيده بيران نرسه ايتمگن.