جوزجان ولايتي نينگ ايككي ناتيچ اولسوال ليگي ني طالبان دن تازه لش اوچون اوچ كون آلدين باشلنكن شاهين٢٢٠ناملنگن عمليات ده يير و هوا قوتلري اشتراك ايتكن.

جوزجان ولايت حاكمي سوزلوچي سي عبدالمعروف آذر نشانه خبر آژانسي بيلن صحبت ده ، بو عمليات نتيجه سيده حاضرگه قدر دولت نينگ ٤ قوراللي مخالفي هلاك و ١٠ جنگچي سي هم ياره لنگن ديب ايتي. آذر جنابلري هلاك بولگن قوراللي لر شيخ ناملي طالبان نينگ بير مشهور قومانداني نينگ آدم لري جمله سيدن بولگن ديدي.

حاضرگه قدر خانقا و فيض اباد اولسوال ليك لريگه تيگيشلي بولگن بيش مهم قشلاق و بير استراتيژيك محل طالبان نظارتي دن چيقاريلگن.

جوزجان- مزار شاه يولي حدوديده جايلشگن و طالبان نينگ باج آلوچي مركزي بولگن شاه ميرزا منطقه سي هم ملي اردو عملياتي عاقبتيده طالبان نظارتي دن چيقاريلدي و طالبان نينگ بو محل ده گي قرارگاهي نابود قيليندي.

جوزجان ولايتي فيض اباد تومني پوليس باشليغي محمدنادر اندرابي ني رسانه لرگه ايتيشيچه “شاه يول كيچه كندز مردم يوزيگه آچيق بولگني اوچون سعي قيلماقده ميز، شو مقصد اوچون حربي عمليات باشلگن و هلي هم دوام ايتماقده”.

محل يشوچي لريدن بيري رفيق الله نشانه خبر آژانسي خبرنگاريگه ايتكن كه فيض اباد تومني ني ٢٤ قشلاقي بار اوندن ٢٠ قشلاق طالبان نظارتي آستيده ايدي و بو عمليات باشلنگن دن بيري بو قشلاق لر الدين كين طالبان نظارتي دن چيقاريلماقده.

طالبان گروهي حاضرگه قدر بو توغريده بيران مناسبت بيلديرمگن.