جوزچان ولایتی ساغلیک نی سقلش مسوللری اوتکن ۲۴ ساعت ده شبرغان شهریده کرونا ویروسی نی یوقتیرگن ۸ تازه واقعه رویخط ده آلینگنی دن خبر بیرگن. جوزجان عامه ساغلیک اداره سی معلوماتیگه کوره تازه واقعه لر بیرعیال شفاکار، ایککی ایرکک پرستار و کووید۱۹ مرکزی بیر ملازمی بولگن.

بو مسوللر، اوتکن ۲۴ ساعت ده جوزجان ولایتی دن آلینگن ۲۰ شبهه لی واقعه دن ۸ نفر نتیجه سی مثبت بولگنی انیق لنگن دیب ایتکنلر. جوزجان مرکزی کسلخانه سی یوقمه کسللیک لر بولیمی مسولی خالص قادری نشانه خبرآژانسی بیلن صحبت ده دیدی:« بوکون ایرته لب ( سه شنبه ۹ ثور) بلخ ولایتی ده‌گی لابراتوارجوزجان دن جونتیلگن نمونه لردن ۸ ته سی مثبت ایکنی دن خبر بیردی و حاضر جوزجان ولایتی ده مثبت واقعه لرسانی ۱۰ نفرگه کوپیگن.» اونی معلوم قیلیشیچه بوسکیز مثبت واقعه دن تورت ته سی ساغلیک نی سقلش ملازم لریگه تیگیشلی دیر.

اوتکن هفته جوزجان مرکزی کسلخانه سی جراح سی داکتر پویا عزیزی کرونا ویروسی نی یوقتیرگنی سبب عالم دن اوتی. اونی وفاتی دن سونگ جوزجان مرکزی کسلخانه سی نینگ تورت متخصص شفاکاری و باشقه بیرقطارملازم لر قرنطینه بولگندی لر.

 هرچند جوزجان ولایتی عامه ساغلیک اداره سی مسوللری کرونا ویروسی نی یوقتیرگن شخص لر کیم لیگی فاش ایتمگن اما تازه لیک ده کرونا ویروسی گه چلینگن بو سکیز کیشی دن بیری آقچه تومنیده شخصی کیلینکی بولگن بیرعیال شفاکار ایکنی نی معلوم بولگن. مسوللرگه کوره بو شفاکار ساغلیک وضعیتی حاضریخشی دیر. آقچه اولسوال لیگی ایریم اهالی سی نشانه خبر آژانسی بیلن صحبت ده بو شفاکار ایران دن یقین کونلرده قیتیب کیلگن بیرقرینداشی بیلن تماس ده بولگنی سبب کرونا ویروسی نی یوقتیرگن دیب ایتکن.

باشقه تماندن جوزجان ولایت حاکمی اورین باسری عبدالقادر مالیه، کرونا ویروسی بو ولایت ده اجتماعی گردش باسقیچی ده بارگنی ایتیب کیله سی کون لرده بو ولایت اهالی سیدن کوپ کیشی لر احتمال بو ویروس نی یوقتیریش لری ممکن دیدی. مالیه جنابلری یقین کیله جکده شبرغان شهری و برچه اولسوال لیک لر مرکزلریده قرنطینه نی اوچنچی باسقیچی جاری ایتلیشی دن خبر بیرگن. بو باسقیچده برچه عمومی محل لریاپیلیشی نظرده آلینگن.