زين‌الدين ٣٠ ييل آلدين جوزجان ولايتي خواجه دوكوه تومني ده توغيلدي و سكيزييل آلدين ملي اردو صفيده عسكر اوله راق خذمت قيليش پيتيده هلمند ولايتي كجكي اولسوال ليگي ده ماين پارتلشي نتيجه سيده ايككي اياغيني قولدن بيردي. او حاضر بير ساده گنبدلي اويده كون كيچيرماقده.

زين‌الدين ديدي بيرسنگرداشي ني اوت ايچي دن قوتقريش ني قصد قليب حركت قيلگن ده اوزيم ماين گه دوچ كيلديم ديدي:
«توقنشو چاغيده سنگرداشيم اوت و اوق ايچيده بند قالگندي.اوق بير برماقي ني كسيكندي، مين يقيني گه باريب اوني قوتقريب انتقال بيرماقچي بولديم، اما توستدن هواگه كوتاريلديم و بيهوش بولديم، كوزيمني آچگنيمده كابل ٤٠٠ ياتاقلي شفاخانه سيده ايديم.»
زين‌الدين اوزيگه صنعي اياغلر تيارلگن و مدافعه وزيرليگي تمانيدن نيچه بار جسارت مداليني آليب تقديرلنگن اما حاضر ويلچر ياردمي بيلن يورويدي. او ديدي: «كتته اكه م هم ملي اردو صفيده خذمت قيلردي او نيچه ييل آلدين شهيد بولدي، مني ايككي اياغم هم كيسيلدي، حاضر اوز كونده ليك ايشلريم ني بجريش ده قادر ايمس من و بو جهت دن عذاب چيكه من.»

هرچند ماين پارتلشي و اياغي كيسيلگني زين الدين گه كتته شوك بيرگن اما او هلي هم تبسم قيليب اوز روحيه سيني قولدن بيرمگني و حيات ني سيوه من ديدي. دولت زين الدين آي ليگي ني توله ي دي، اوني هر آيي اون مينگ افغاني آي ليگي بار و هر آلتي آي ده بانك دن قولگه كيلتيره دي؛ اما زين الدين ديدي:

«حاضر برچه احتياج ليك لريمني ساتيب آليشگه مجبور من، چون ايندي نه سو كيلتيره آله من و نه هم ايكنزارلرده بيل اوره آله من، آي ليگيم كفايه ايتمي دي، انده سنده ايناغه لريم دن پول آليشگه مجبور بوله من.»

زين‌الدين گه كوره اوروش قوپال دير و بو موضوع ني او پيت انگلش ممكن كه اوني تجربه قيلگن بولسك.هيچ قچان بير عسكر اوروش خاطره و تاثيرات لريني اونوته آلميدي.چونكه اوروش نه فقط زين الدين اياغي ني آلگن بلكه كتته ايناغه سيني هم آلگن و حاضر او قالگن و بير ويلچر و صنعي اياغ و بير عالم خاطره. زين الدين ديدي:

«ايككي اياغيم ني قولدن بيرگنيم دن سونگ، اوروش دن كين يا تينچليك ده اوته ياتكان حيات هيچ نرسه ني اوزگرتيره آلميدي. مين روحيه ام ني باي بيرگنيم يوق، يالغيز سوزم شوكه اوروش قوپال، اوروشده آدم لر اولديريله دي،اعضاي بدني كيسيله دي و نهايت ده اوروش آدملرني بدبخت قيله دي.»

جوزجان ديك كم بغل بير ولايت ده زين الدين نينگ حياتي خوش كيچميدي، شو سبب دن او بو ولايت نينگ اقليم و شرايطي دن شكايتي بار: “قار و ياغين پيتيده اوي دن تشقريده چيقه آلمي من و بو نرسه مني كوپ اذيت قيله دي.»

زين‌الدين ني فرزندي يوق، او تورموش اورتاقي بيلن ايناغه لري بيلن بيرگه يشي دي. زين الدين ايناغه لريدن بيري سيد مولان اوني حقيده ديدي: “اوني هيچوقت يالغيز قويمي ميز، ايناغه لريم اولكه لريگه خذمت قيليش مقصديده ملي اردو صفيده قوشيلديلر، دولت دن طلب ميز شوكه اوروش ده اعضاي بدن لريني قولدن بيرگن كيشي لرگه كوپراق اعتبار بيريشي شرط، چونكه بولر ايشلش گه قادر ايمس ديلر، دولت ناگران عسكرلرگه مخصوص امتياز بيريشي لازم.»

زين‌الدين تبسم بيلن صنعي اياغلريني كوتاريب قيينتچليك بيلن ويلچريگه مينب و حيات شنداي حالتده هم ارزگوليك و شيرين دير و اوروش ايسه اوني قرشي سيده تورگن قوپال نرسه دير ديدي.