شبرغان شهري افغان – ترك كسلخانه سيده ايككي اياغي كيسيليب ياتقيزيلگن ٤٠ كونليك باله، ناانيق كيله جك حيات اوچون نفس تارتماقده.

حيات ده كوپ درد لر بار كه وقت اوتيشي بيلن اونيتيله دي اما ايريم دردلرهم بار كه وقت اوتيشي بيلن كتته راق بوليب حتي اوليم كوني گه چه انسان بيلن يولداش دير.

يريم وقت لر يوز بيرگن بير درد و قيغو حقيده يازيش، اوقيش يا كوريش و بيليش انسانلر كوچ دن تشقري دير، اما بو دردلرني ايزلش كيرك، چونكه بو درد و قيغولردن حكايه قيليش، اويقيده بولگن وجدان لرني اويغاتيش دن علاوه بونداي واقعه لر تكرار بوليشي آلديني آليشي هم ممكن.

نيچه كيچه آلدين فارياب ولايتي اندخوي اولسوال ليگي ده سكيز كيشي ليك بير عايله قوراللي لر تمانيدن نشانگه توتيلديلر و فارياب ولايتي امنيتي قوتلري اولرني طالبان ديب تانيشتيرديلر.

بو عايله نينگ اينگ كيچيك قرباني سي ٤٠ كونليك ياش باله دير كه اوز جوره سيني بو حادثه ده قولدن بيردي و حاضر كيسيلگن ايككي اياغي بيلن شبرغان نينگ افغان- ترك كسلخانه سيده بير محفظه ايچيده سخلنماقده.

فارياب ولايت حاكمي نقيب الله فايق اندخوي اولسوال ليگيده يوز بيرگن بو واقعه ني جنايت اتب بو قانلي حادثه عاملي ني طالبان نينگ خنجري گروهي قوراللي لري ايكني تانيشتيرگن.

فايق جنابلري بو واقعه طالبان نظارتي آستيده بولگن اورگنجي خانه قشلاقي ده و قربان بولگن كيشيلر اويي طالبان قوماندان لريدن بيري نينگ اويي دن ايككي يوز متر مسافه سي بولگن جاي ده يوز بيرگن ديب ايكن.

نشانه خبر آژانسي خبرنگاري بو واقعه دن كوپراق معلومات حاصل قيليش اوچون شبرغان شهري افغان – ترك كسلخانه سيگه باريب بو واقعه ده يارلنگن بو باله عمه سي بيلن بو قانلي واقعه حقيده گپلشكن.

واقعه ده جراحتلنگن ايككي كيشي ني يريم كيچه شبرغان شهريگه كيلتيركن قندي گل ” شام يقيني ده برق ميز كيتي، بيز اقشام اوقاتي ني صرف لش اوچون دسترخوان ني توشب اوقات لنيش چاغيده ايديك، قيزيم تلفن قيليب تاغم ني برچه عايله اعضالريني اتيب اولديرديلر ديب خبر بيردي، جسدلر اندخوي كسلخانه سيگه انتقال بيريلگني اوچون شفاخانه گه بارديم بو باله ني كه كوره سيز بولر جملي ( جوره) ايديلر ، بيري حادثه ده اولديريلدي” ديدي.

قندي گل بو حادثه ده ياره لنگن ٤٠ كونليك برادرزاده سي و ينه بير قيزني دوالش اوجون اوشه كيچه شبرغان گه آليب كيلديم و شفاكارلر بو چقلاق تيريك قاليشي اوچون اوني ايككي اياغي ني كيسيش گه محبور بولديلر و منه حاضرگه چه بو باله تيريك قالگن ديدي.

قندي گل ني ايتيشيچه ايناغه سي بير ساده دهقان و بير آغيز نان ارقه سيدن سرگردان ايدي، نيگه بو واقعه يوز بيرگني ني بيلمي من.

فارياب ولايتي امنيه قومانداني غيب الله سادات بو واقعه ده اولديريلگن شخص لر ساني ني اوچ عيال، ايككي ايركك و بير باله داخل آلتي كيشي بولگني ني ايتكندي.

بو عايله اعضا سي بولگن ياش بير قيز شبرغان نينگ ملكي شفاخانه سيده ياتقيزيلگن، كورينيشي دن ساغليك وضعيتي يخشي. او يوز متر اوزاق ليكده ٤٠ كونليك سينگلي سي اياغي كيسيلگن بي خبر دير.

كسلخانه ده مراجعه ايتكن شبرغان عادي يشوچي لريدن بيري محمد اكبر، منه ٥٠ياشيم ده بونداي قانلي واقعه خصوصا ٤٠ كونليك بير چقلاق ني ايككي اياغي كيسيلگن بولسه كوركنيم يوق.بو اسلام و انسان گه ضد بير عمل دير ، بو خبرني ايشيتگن دن بيري احوالم يخشي ايمس ديب ايتي.

محمد اكبر افغانستان ده ٤٠ ييل دن بيري اوروش دوام ايتماقده مسلمان لر ، مسلمان لرني اولديريشي نا روا دير ديدي.

هرچند شاهين قول اردو سي سوزلوچي سي محمد حنيف رضايي بيركون آلدين حقيار اسمي گه مشهور طالبان قوراللي قوماندان لريدن بيري ملاابراهيم اولديريلگني دن خبر بيريب و بو طالب فارياب ولايتي قرمقول اولسوالي اوچون طالبان نينگ معارف اداره سي مسولي و عيني دمده اندخوي واقعه سي اصلي عاملي بولگني ني ايتي.

حاضرگه قدر بو عايله نينگ تيرباران بولگني سببي معلوم ايمس؛ اما هرنرسه بولگنده كيچيريب بولمس جنايت دير كه بو واقعه ده جراحتلنگن گناه سيز باله لر اوني قيغو و المي ني اصلا  چيده آلميديلر.

بو واقعه يوزبيرگني دن نيچه ساعت اوتگچ طالبان گروهي نشر ايتگن پياملريده بو واقعه مسوليتي ني رد ايتكن.