فارياب ولايتي مركزي ميمنه ده يشه ياتگان بير آنه، هرچند تورت ييل آلدين فرزندي دنيا دن اوتكني انگلگن، اما هربار كه فرزندي ايسيگه توشسه و خاطره لري قيته ذهني گه يول تاپسه، ميمنه شهري مركزي كسلخانه سيگه باريب امبولانس لر شيشه لرني تازه لب كونگلي راحت قيله دي.

فرزندي امبولانس هيدوچي ايدي، اسدالله تورت ييل آلدين بير انتهاري هجوم ده اولديريلدي. اما بو آنه، هربار فرزندي ايسيگه توشكني بيلن ميمنه مركزي كسلخانه سيگه باريب اوني همكسب لري بيلن اختلاط قليب قيغو و الم لريني تازه ليدي.

تورت ييل دن بيري اسدالله نينگ آنه سي و تورموش اورتاقي اوني عزاسيگه اولتيرگن.

اسدالله آنه سي هربار فرزندي ايسيگه توشسه، فرزندي هيده ياتگان امبولانس ني تاپيب خسته قول لري بيلن امبولانس شيشه لريني تازه ليدي.

اسدالله آنه سي زليخا نشانه خبر آژانسي بيلن صحبت ده اسدالله حقيده بونداي حكايه قيلدي: ” فرزندم اسمي اسدالله ايدي. او امبولانس هيدوچي سي و مردم خذمتچي سي ايدي.او هركوني فارياب اولسوال ليك لريدن كسل لر و ياره لنگن اهالي حياتي نيدقوتقريش اوچون شفاخانه ده انتقال بيرردي. تورت ييل آلدين نوروز كوني ده فرزندم بير خودكش هجوم ده اولديريلدي”.

اسدالله دن بيز قيز قالگن، اسدالله آنه سي اوز قيغو و المي ني تسكين بيريش اوچون انده سنده شفاخانه گه كيليب بونداي سوزلريني دوام ايتيره دي:” شفاخانه گه كيليب فرزندم امبولانسي شيشيه لريني تازه ليمن و همكسب و دوست لريني كوريب كونگليم راحت بوله دي”.

كوزيدن ياش توكيليب سوزلريني علاوه ايته دي زليخا:” انتهاري لر يير بغريني مردم نينگ ياش فرزندلري جسدي دن تولديردي، اوروش همه گه مصيبت كورستي.يالغيز مين درد كورگن آنه ايمس من، برچه اهالي درد و قيغو كورگن، انتهاري هجوملر كوپ فرزندلرني بي آته قيلدي و شونينگ ديك بو اوروش كوپ عياللرني بيوه قيلدي”.

زليخا قول لريني كوتاريب دعا قيله دي:”الله تعالي درگاهي دن اوروش و انتهاريني اولكه ميزدن يوقاتيشي ني التماس قيله من”.

بو دردكوركن آنه نينگ يگانه دعاسي  افغانستان ده، اوروش يكونلنيشي و ياش وييگت لر كونگلي شاد و برچه اهالي تينچليك و خرسندليك بيلن حيات كيچيريشگه خلاصه بوله دي.

فارياب عامه ساغليك اداره سي ريسي شفاكار محمدنعيم صيميم، اسدالله آنه سي حقيده ايتي:” بيز اسدالله آنه سي فرزندي هجريدن روحي خسته ليك گه دچار بولگني دن خبر بولگني ميزدن بويان ،اوني فارياب مركزي كسلخانه سي باش طبيبي نزديگه جونتديك، شفاخانه حاضر اوني روحي خسته ليگي ني دوالشماقده”.

صميم جنابلري،اسدالله آنه سي هربار كسلخانه گه كيلگنيده، برچه شفاكارلر،خادم و ملازملر اوني بيلن قيغوداش كورستيب اونگه مادي و معنوي همكارليك قيله ديلر و شونينگ ديك اسدالله عايله سيگه كوپراق ياردم كورستيليشي اوچون بيز ولايت حاكم ليگي گه مكتوب جونتديك ديدي.

افغانستان دوام ايته ياتگان اوروش سبب كوپ كيشي لر قربان بوليب كوپ جاي لر خرابه گه ايلندي، بو قربان لردن اكثريتي گناه سيز عادي اهالي بولگن. بو ويرانليك لرني قيته ابادان لشتيريش كورينيشي دن حاضرچه ناممكن دير.