بدخشان ولايتي بيرقطار دين عالم لري فيض آبادشهريده اوتكزيلگن يغين لريده مملكت ده كرونا ويروسي گه نسبتا” مردم نينگ بي فرق قاليشي و هيت كونده لريده گروهي مراسم لر اوتكزيليشي دن تشويش اظهار ايتيب مردم دن ساغليك ني سقلش توصيه لر و اجتماعي مسافه ني رعايه ايتيش ني طلب ايتكن لر.

دين عالم لري، اگر ضرور بولمگن باردي كيلدي لر و هيت كونلريده گروهي يغين لر يولگه قويليشي اوچون جدي چاره تدبير كورين مسه انساني فاجعه يوزبيريشي دن اهالي ني آگاهنتيرگن لر.

بدخشان ولايتي حج و اوقاف و ارشاد اداره سي ريسي نورالحق نوري بو يغين ده، دين عالم لري قرنطينه شرايطي، ساغليك ني سقلش توصيه لر و اجتماعي مسافه اهالي تمانيدن رعايه ايتيلمگني دن تشويش ده ايكني ني اورته گه قويب ديدي:” بدخشان ده دين عالم لري، حج و اوقاف اداره سي هماهنگ ليگي بيلن اهالي آره سيده كرونا ويروسي تاباره ييرليشي آلديني آليش اوچون بيرقطار معلوماتي دستورلرني قول اوستيگه آليب هيت كونلريده بو ويروس ييرليشي آلديني آليش طريقه لريني مردم گه يتكزماقچي لر.” اونگه كوره مملكت ده” كوويد ١٩” ويروسي تاپيلگني دن بو اداره دين عالم لري همكارليگي بيلن بيرقطار ايجابي برنامه لرني عملي قيلگن اما ينه هم هيت كونلريده ضرور بولمگن برنامه لر آلديني آليش ده معلوماتي دستورلرني يولگه قويماقچي لر.

باشقه تماندن بدخشان ولايتي دين عالملر كينگاشي ريسي سعدالله ابوامان ديدي كرونا ويروسي ييرليشي آلديني آليش اوچون دين عالم لري مسوليتي آغيردير و بو قتلم ، دين توصيه لريگه اساس لنيب مردم نينگ بيليم و معلومات درجه سيني كوتاريش لري كيرك. بدخشان ولايتي دين عالملر كينگاشي ريسي مردم ساغليك ني سقلش توصيه لر و دين عالم لري اگاهلنتيريش لريني نظرده توتمسليك لريدن خواتير بيلدريب ديدي:” دين عالم لري بار بار مردم گه معلومات يتكزيب موجود خطرلردن آگاهلنتيرديلر اما مردم اونگه عمل قيلميديلر.” ابوامان جنابلري، دين عالم لري بونداي شرايط ده عامه ساغليك اداره سي هماهنگ ليگي بيلن كرونا ويروسي ييرليشي آلديني آليش اوچون ساغليك ني سقلش پياملرني مردم گه يتكزيش ده مسوليت لري بار ديب ايتي.

بدخشان دين عالم لر كينگاشي ريسي علاوه ايتي بو كينگاش اولكه ده كرونا ويروسي ييرليشي آلديني آليش اوچون نيچه اعلاميه صادر ايتيب و مردم دن، هيت نمازيني آچيق فضاده و اجتماعي مسافه ني رعايه ايتيش بيلن ادا قيليش و هيت كونلريده بيربيرلري اويلريگه باردي كيلدي دن وازكيچيش لريني طلب ايتكن.

بدخشان دين عالم لري تاكيدلشكن، مردم هيت كونلريده هييللش، فاتحه خوانليك و باشقه ضرور بولمگن مراسم لرني اجرا ايتمسليك لري لازم. دين عالم لر كينگاشي شونينگ ديك بدخشان محلي حكومتي دن اولكه ده كرونا ويروسي ييرليشي آلديني آليش اوچون هيت نينگ اوچ كونيده اهالي باردي كيلدي سي آلديني آليش اوچون مخصوص چاره تدبير قول اوستيده آليشي ني هم طلب ايتكن.

عبني حالده بدخشان عامه ساغليك اداره سي ريسي نورخاوري هم بدخشان دين عالم لري، جامع مسجدلر خطيب لري و يشوچي لريدن، هيت نمازي ده اجتماعي مسافه ني رعايه ايتيش و هيت نمازي آچيق فضاده اوقيليشي طلب ايتكن. بدخشان عامه ساغليك اداره سي ريسي كرونا ويروسي بو ولايت ده اجتماعي گردش حالتي ده ايكني ني قيد ايتيب اگر وقايوي چاره تدبير آلينمسه و مردم ساغليك ني سقلش توصيه لرگه عمل قيلمسه لر بو ويروس ني كنترول قيليشي دولت كوچ و امكانيت دن چيقيشي ممكن ديدي.

بدخشان عامه ساغليك اداره سي كرونا ويروسي گه قرشي كورش كميسيوني فعاليت لريني ايسلتيب ديدي بو كميسيون قرنطينه شرايطي، ساغليك ني سقلش توصيه لربويچه اهالي گه معلومات يتكزيش ، دولتي و نا دولت اداره لر ارا هماهنگ ليك، شبهه لي كيشي لرني تاپيش و ايزلش،اويلرده شبهه لي ادم لر اوچون قرنطينه شرايطي ني مساعد ايتيش، قرنطينه لايحه سي ني عملي لشتيريش،كرونا ويروسي ني يوقتيرگن بيمارلر ضرورت لريني تامين لش، مركزي حكومت نينگ ماليوي ياردم لريني جلب ايتيش،كرونا ويروسي ني يوقتيرگن بيمارلرني سخلش اوچون مخصوص محل لرني مساعد ايتيش،ساغليك ني سقلش ملازملريني ايشگه آليش و كرونا ويروسي گه قرشي كورش ده محلي منبع لردن فايده لنيش بويچه تورلي برنامه و لايحه لرني چيزيش كبي موضوع لر باره سيده ايجابي ايشلرني عملي قيلگن و بو توغريده كوزگه كورنرلي يوتوق لرگه هم ايريشكن ديب ايتي.

بدخشان ساغليك ني سقلش اداره سي مسوللريگه كوره كرونا ويروسي تاپيلگندن حاضرگه قدر بو ولايت ده ١٦ مثبت واقعه رويخط ده آلينگن ، بوندن ايككي كيشي سي ساغلگن و ١٤ بيمارهم كوويد١٩ شفاخانه سيده سخلنيب دوالنماقده.