هرات قيشي، پيپاق ايشلب چيقاروچيلر بهاري
neshananews
30 January 2020اكثر اهالي گه كوره پيپاق(جوراب) احتمال بير ساده كييم دير اما شو ساده كييم اوني ايشلب چيقاروچيلري اوچون درآمد و روزغارلري احتياجايك لريني تامين لش منبع سي حسابلندي.
محسن اسملي بير ياش هرات ده اويي نينگ پاركينگي ده پيپاق ايشلب چيقاروچي كيچيك كارخانه قوريشكن.هرچند بو كارخانه خارجي محصولات بيلن رقابت قيليش ده كوچسيز، اما يارقين كونلر اوچون هيچ قچان تنفس دن قالمگن.
ايش مستقل ليگي اوچون آرزو
محسن نينگ جوراب ايشلب چيقاروچي كارخانه سيده ايشكي دن ايچكريده كريشينگيز بيلن دقتينگيزني اوزيگه جلب ايته باتكان دستلبكي منظره اوني عايله اعضاسي دير.
عايله اعضالري پيپاق ايشلب چيقاراتگان تورت ماشين اطرافيده توختب هربيري بو كارخانه ده بير مخصوص ايش بيلن بند.
محسن نينگ پيپاق ايشلب چيقاراتگان كارخانه سيده گي ماشين لر چرخي، اوني عايله سي روزغاريني تيربته دي.
محسن ٢١ ياشده من ديدي، اقتصادي قيينتچليك و كيكسه آته سي بيمار بولگني سبب درس و تعليم دن وازكيچيش گه مجبور بولديم ديدي.
باله ليك دن عايله سي روزغاريني تامينلش مسوليت بوبنيگه توشكندن بويان دايم بير مستقل ايش ايگه سي بوليش ني ارزو قيلردي. اما كورينيش دن ايندي اوني بو ارزوسي عملي بولگن.
محسن ني ايتيشيچه بو كارخانه ده هر كوني ١٢٠٠ جوره پيپاق ايشلب چيقاريلدي.
عايله، بو كارخانه ني پاي ديواري
محسن نينگ كارخانه سي ايشي هيچ قچان توختلمگن چونكه اوني برچه ايشچي لري عايله سي اعضالري دير.
او بوكارخانه ده كيكسه آته و آنه سيگه هم ايش تاپيب بيرگن، كارخانه نينگ ياشي آرتيشي بيلن، محسن عايله سي نينك ماليوي مستقل ليگي و خرسندليگي هم كوپيب بارماقده.
محمد امين و زهرا ، محسن نينگ آته و آنه سي، عايله لري اوچون يخشي درآمد منبع سي مساعد ايتيلگن دن جوده هم خرسند كورينه ديلر.
محس نينگ آته سي ايران ده مهاجرت نينگ اچيغ تجربه لريني باشدن كيچيرگني ني ايسلتيب بو كارخانه ده ايش له ياتگان هر بير لحظه دن لذت كورينسي دن قوانچي ني اظهار ايتيب عايله سي نينگ كيله جگي يارقين ايكن ليگي گه ايشانچيم كامل ديدي.
دولت كسبه كارلردن حمايت ايتماقچي
جوراب بازاريده چين محصولاتي كبي جدي رقيب لر بارليگي گه قرگنده، محسن و عايله سي تشويشي گه سبب بولگن موضوع، دولت تمانيدن ايچكي محصولات دن حمايت كورستيلمگني دير.
اما كسبه كارلر اويشمه سي مسول لري بونداي كيچيك تشبث لردن حمايت و ارقه داشليك كورستيش دن سوز يوروته ديلر.
كسبه كارلر اويشمه سي مالي مصلحتچي سي عبيدالله ياري، يقين كيله جكده هرات شهري جنوبغربيده كيچيك تشبثكارلر اوچون مخصوص شهرچه ايجاد ايتيليشي دن بشارت ببره دي.
اوني ايتيشيچه بو شهرچه ايجاد ايتيليشي بيلن بو تشبثكارلرني ايشلب چيقاريش قابليت لري آشيريليب و اهالي گه ايش زمينه سي ني مساعد ايتيش ده قادر بوله ديلر.
هرچند خارجي محصولات، ايچكي محصولات رواج رونقي برابريده كتته كات توسيق بوليب تورگن اما كورنيشيدن فقط دولت دير كه بونداي تشبثكارلردن حمايت ايتيشي بيلن، مملكت اقتصادي ني قوللب قوتلش ده ييريك حصه قوشه آله دي.
