مملکت نینگ ۲۳ ولایتی ده کرونا ویروسی ییرلگنی، کوپلب اهالی نی خانه نشین قیلگن. هرچند حاضرگه قدر اهالی دن کوپراقی کرونا ویروسی نی جدی توتمگنلر اما شخصی و اجتماعی توصیه لرنی رعایه ایتیش اوچون ایریم شخص لر قرنطینه و یا خانه نیشین لیک نی اختیارقیلگنلر.

 بلخ ولایتی ملی تلویزیونی یازوچی و ایشیچی سی مینه سلیمی، بلخ ولایتی ده کرونا ویروسی بیرینچی مثبت واقعه سی رویخط ده آلینگنی دن سونگ اوزینی اویی ده قرنطینه قیلگن. او ملی تلویزیون اداره سیده فارسی خبرلرنی پشتوتیلی ده ترجمه قیلردی .بو خبرنگار کرونا ویروسی نی یوقتیرمگنی اوچون برچه ایشلرنی اوی دن بجریش ده قرار آلگن.

 هرچند اویده قالیش، چیت ده ایشله یاتکان آدم لراوچون قیینت اما اولکه ده مدنی فعال و خبرنگار اوله راق تانیلگن خانم سلیمی گه کوره شخصی مصونیت اوته مهم دیر. اودیدی:« طبعیت بیلن دشمن لیک قیلیش ناممکن دیر، بلکه اوزیمیز و اولکه میزساغلیک نی نظر توتیش میز لازم دیر».

  مینه سلیمی بلخ عالی اوقویورتی اقتصاد فاکولته سی نی بیتیرگن و خبرنگارلیک رشته سی نی بیر خصوصی عالی اوقویورت ده اوقیگن. بو یاش خانم سکیز ییل دن بیری بلخ ملی رادیو وتلویزیونی ده ایشلب کیلمقاده.او« مین هم اوزیم وهم عایله ام وهم تورک اطرافیم ده‌کی شخص لر ساغلیک لرینی سخلش اوچون اوزیم نی قرنطینه قلیب اوی دن چیق مسلیک گه قرار آلدیم» دیب ایتی.خانم سلیمی ۷ کون دن بیری اوی دن چیقمگن او« کرنا ویروسی ییرلیشی خواتیری اولکه ده بولسه اویده قالیش نی افضل کوریب اوی دن چقیمی من» دیدی.

کتاب اوقیش، گیتارچلیشِ، سپورت و آشپزلیک قرنطینه کونلریده خانم سلیمی نی کونده لیک ایشلری جمله سیدن دیر.سلیمی خانم، هرکونی هوسانه اوقات لر پیشیریش و گیتار چلیش بیلن یخشی کونلرنی اوتکزماقده من دیب فکر بیلدیردی .

 اونی عایله سی هم کرونا ویروسی نی جدی توتکن لر. بو عایله یالغیز بیرکیشی نی تشقریدن سودا ساتیق آلیش و تشقریده‌گی ایشلرنی بجریش اوچون وظیفه لنتیرگن. مینه سلیمی دیدی:« همه میز مصون قالیشی میز اوچون فقط بیرکیشی کونده لیک ضرورت لرنی تامین لش اوچون بازارگه چیقه دی و اوهم برچه ساغلیک نی سخلش توصیه لرگه عمل قیله دی».

 اویده قالیش بو خبرنگارنی، رسانه ای فعالیت لریده توسیق یرتمگن. اوتمیش ده مردم بیلن توغریدن توغری تماس ده بولگن خانم سلیمی هلی هم بلخ ولایتی ایریم یشوچیلری بیلن تلفن آرقلی تماس ده مین دیب کیله جکده مردم گه یخشی راق خذمت قلیش و وظیفه ام نی معیاری روشده بجریش اوچون ساغلان قالیشیم لازم و شونی اوچون برچه ساغلیک نی سخلش توصیه لرگه عملی قیله من دیدی .

   گیتار اوازی خانم سلیمی اوی فضاسینی سیوملی قیلگن.خانم سلیمی قرنطینه کونلریده گیتار چلیش حقیده دیدی:« اوتکن بیر هفته جریانیده گیتارنی نیچه ریتملرنی مشق قیلدیم.کیچیک سینگلیم هم گیتار اورگنیش گه رغبت کورستکن و کرونا معما سی برطرف ایتیلگندن سونگ گیتار چیلیش نی اورگنماقچی».

  بونگه قره مسدن اویده یکه اولتیریش و عایله اعضالرینی قیزیقتیریش مینه سلیمی نی یگانه ایش ایمس. او دیدی ساغلیک نی سخلش توصیه لرنی عایله اعضالریگه اورگتیش و اونی عملده جاری ایتیش، کرونا ویروسی دن امان قالیش اوچون اونی باشقه برنامه لری جمله سیدن دیر. بلخ ولایتی بو یشوچی سی هرکونی اوی دروازه لری ، کاغذی پوللرو تشقریدن اویده کیلتیریله یاتکان اشیالرنی کرونا ویروسی دن امان قالیش اوچون شخصا  ضد عفونی قیله من دیدی.

  مینه سلیمی بلخ کبی بیر عنعنوی اولکه ده یشه یاتکان عیاللردن بیری دیر که اوزینی قرنطینه قیلیش بیلن اولکه ده‌گی ناتوغری توشینچه لرنی عقلی و منطقی ایشلربیلن المشتیرگن.

 هرچند کرونا ویروسی نی یوقتیرگن لر سانی اولکه کون اوتیشی بیلن‌آرتیب بارماقده اما افغانستان ده آز سانده اهالی بو جهانی معمانی جدی توتکنلر.کوپلب قشلاق لرده هرچند مردم کرونا ویروسی خطرلریدن اگاه دیر، اما هلی هم عمومی یغین لر، توی ، فاتحه مراسم لری و ختم خیرات فلیش دن اهالی وازکیچمگن لر.قشلاقلرده یشه یاتکان بیرقطار اهالی الله تعالی بو یوقمه کسل لیک دن بیزنی امان اسریدی دیب ایشانچ لری کامل ایکنی نی اورغولیدیلر.

اما مینه سلیمی کبی بیلمی آدم لر بو حقده دیدیلر:« الله تعالی بیزنی اسره شی توغری اما انسان اوله راق بیزنی مسولیت میزشوکه نمه ایش اوزیزی میزو اولکه میزنی فایده سیگه و نمه ایش ضرریگه بولگنی نی انگلشی میز کیرک». خانم سلیمی دینی اصوللرگه اساسا اوزجان میزنی اسره ش میز فرض دیردیدی.

بو وضعیت ده اوی دن چیقمس لیک یا قرنطینه ده کون کیچیریش، کوپلب آدم لرگه، اوتمیش ده اویله مگن موضوع لر بویچه جدی راق اندیشه قلیش فرصتی نی هم مساعد ایتکن. حاضرگه قدر بوتون مملکت ده ۳۰۰کیشی کروناویروسی نی یوقتیرگن. شفاکارلر و دین عالملری گه کوره بو جهانی معما دن هیچ کیشی مستثنی ایمس و ساغلیک نی سخلش معیار وتوصیه لرنی رعایه ایتمه یاتکان کیشیلر بو خطرلی ویروس نی یوقتیریش لری ممکن.

 کرونا ویروسی کوپگینه قیینت چلیک توغدیرگن حالده آدم لرنی بیرقوشمه نقطه گه هم بیرلشتیرگن.مردم نینگ بوکونگی آرزو لری عادی کون لرگه قیتیش دیر. مینه سلیمی دیدی:« کرونا ویروسی کورستی که بیزآدم لر بوندن آلدین که بیر خاص قوم، دین یا تیل گه تعلقی میزبولسه، انسانیت گه تعلقی میز بار.مین اوندای بیر حالت نی ارزو قیله من که انسان لر تیل، قوم ،مذهب و رنگ لریگه قره می بیربیرلرنی سیو سه لر». مینه سلیمی شونینگ دیک برچه وطنداشلریدن اوزلری و باشقه لرنی بوخطردن قوتقریش اوچون ساغلیک نی سخلش بویچه شخصی و عمومی توصیه لرنی رعایه ایتیش لری کیرک لیگی نی هم طلب ایته دی.