هرات نینگ اوبه تومنیده قماققه آلینگن خوفسیزلیک کوچلر، قرینداشلری هرات ولایتی حاکملیگی اېشیکنی یاپیب قۉییشدی
سۉنگگی بېش کون ایچیده هرات ولایتی نینگ اوبه تومنیدهگی بیر قطار خوفسیزلیک کوچلر، طالبان قملیده بند قالگن. اوشبو کوچلر قوم و قرینداشلری بوکون ( پنجشنبه ۲۷ جوزا) هرات حاکملیگ بناسی قرشیسیده ناراضیلیک نمایش اویشتیریب هرات حاکملیگ بناسی دروازهسینی یاپدیلر. اولر محلي حکومتدن اوشبو کوچلرنی طالبان قملیدن قوتقریشني طلب ایتماقده.
نمایشچیلر نینگ ایتیشیچه، حکومت، هرات نینگ اوبه تومنیده طالبلر قملیده بۉلگن ۵۰ ته خوفسیزلیک کوچلرینی قوتقریش اوچون شو پیتگچه هېچ قندهی چاره کۉرمهگن. اولر نینگ سۉزلریگه کۉره، اوشبو کوچلر نینگ اکثریتی طالبانگه قرشی کورهشده یرهلنگن و اولر نینگ احوالی آغیر.
نمایشچیلر جراحت آلگنلرنینگ احوالی کۉریب چیقیلمسه، اولر ناراضیلیک نمایشلرینی دوام اېتتیریشی و هرات حاکملیگ ادارهسی اېشیگینی اوزاق وقت یاپیق سهقلشلرینی آگاهلنتیرماقدهلر.
بیراق، هرات حاکمی مطبوعات سوزچیسی جیلانی فرهادنینگ ایتیشیچه، حاکم نمایشچیلر وکیللری بیلن اوچرهشگندن سۉنگ یرهدارلرنی زودلیک بیلن انتقال بیریلیشینی وعده بېرگن.
بو ناراضیلیک نمایش، سۉنگگی هفتهلرده هرات نینگ اوبه تومنیده جنگلر اوج آلگن پیتگه تۉغری کېلهدی. عامهوی اخبارات واسطهلر خبرلریگه کۉره، تومندهگی بیر قطار خوفسیزلیک پوستهلر هم طالبان تامانیدن اۉرهبآلینگن.