طالبانگه قرشی عامهوي سفربرلیک؛ جوزجانليک عیاللر قورال کۉتاریشگن
شبرغان شهریده بیر قطار عیاللر قورال-یراق آلیب، خوفسیزلیک تهدیدلر و طالبانگه قرشی کورشده حصه قوشماقچی بولگنلر. عیاللر جوزجان ولایتی مرکزی شبرغان شهر اطرافیدهگی قیشلاقلردن کېلیشب اولر نینگ سانی یوزلب کیشی دن عبارت دیر. عیاللر نینگ تأکیدلشیچه، اولر نینگ مقصدی مملکت خوفسیزلیک و مدافعه کوچلری یانیده توریشدیر. جوزجان محلي حکومتی عیاللر نینگ اوشبو حرکتینی قۉللب-قوّتلشکن.
جوزجان ولایتیدهگی خاتین-قیزلر ایشلری باشلیغی مسلِمه عطایی نشانه اخبارات آژانسی بیلن صحبتده، شبرغان توورک اطرافیدهگی قیشلاقلردن بیر قطار عیاللر خاتین-قیزلر بو ادارهگه مراجعت قیلیب و قورال کوتاریشني طلب قیلماقده دیدی. عطایی خانم نینگ تأکیدلشیچه، عیاللر ایشلری ادارهسی بو عیاللرنینگ طلبلرینی جوزجان ولایت حاکمی بیلن اورتاقلشکن.
مسلمهعطایینینگ معلوماتلریگه کۉره، شبرغانده ۱۰۰ دن آرتیق عیال طالبانگه قرشی قورال کۉتارگن. عطایی خانم نینگ سۉزلریگه کۉره، بو عیاللر حکومتدن جاری شرایطیده اولرگه جنگ میدانیده اشتراک اېتیشلریگه رخصت بېریشنی سۉرهشماقده.
۲۸ یاشلی صفيه کَلاشینکوف کوتارگن عیاللردن بیری دیر. اونینگ سۉزلریگه کۉره، بو حرکتی بیلن او خوفسیزلیک و مدافعه کوچلرینی قۉللب-قوّتلهماقده. صفيه خوفسیزلیک و مدافعه کوچلری یالغیز اېمسلیگینی تأکیدلهیدی؛ بلکه اونگه کوره، افغانستاننینگ اېرککلر و عیاللری اولر نینگ یانیده تورگن. او جنگ میدانیگه کیریشگه تیارلیگینی قۉشیمچه قیلهدی.
رقیه اېنگ چېکّه قیشلاقلردن ولایت مرکزی شبرغان شهریگه کېلگن ینه بیر عیال دیر. او ۴۵ یاشده و یېلکهسیده صفيهگه اۉخشهگن کلاشینوفی بار. او ایلکهسیدهگی قورالی گه قرب، ایلگری خودّی شوندای قورال بیلن طالبانگه قرشی کورهشگنینی ایتهدی. بو جوزجانلیک خانم نینگ تأکیدلشیچه، افغان عیاللری اېندی طالبلر رژیمی تکرارلنیشیني ایستهمیدیلر . اونینگ تأکیدلشیچه، جوزجان ولایتیدهگی عیاللر طالبلر نینگ قمچیلشیگه اوق بیلن جواب قَیتریشهدی.
جوزجان ولایتی مرکزی شبرغانده عیاللر اوندای بیرحالده قورال آلیشکنکه، سۉنگگی ایکّی هفته ایچیده ولایت نینگ بیر قطار تومنلری جنگسیز طالبلر قۉلیگه اۉتگن. تخمیناً تۉرت ییل آلدین جوزجان ولایتی نینگ قۉشتپه تومنیده بیر قطار عیاللر داعش گروهیگه علاقهدار جنگچیلرگه قرشی قورال کۉتاریشگندی.