بلخ ده كرونا ويروسي ني يوقتيرگن ايككنچي شخص ساغلدي
neshananews
07 April 2020هرچند مملكت ده كرونا ويروسي ني يوقتيرگن لر ساني كون اوتيشي بيلن آرتيب بارماقده اما بو ويروس ني يوقتيرگن بيرقطار بيمارلر هم ساغلماقده.بلخ ولايتي عامه ساغليك اداره سي مسوللري بوولايت ده كرونا ويروسي ني يوقتيرگن ايككنچي شخص ساغلگني دن خبر بيرگن. مسوللرگه كوره ٢٣ ياشده بولگن بيرياش ١٨ كون قرنطينه دن سونگ ساغليب شفاخانه دن رخصت بولگن.
بلخ عامه ساغليك اداره سي مطبوعات مسولي داكتر فهيم بوكون سه شنبه ١٩ حمل ديدي:” كرونا ويروسي ني يوقتيرگن و بلخ ولايتي حربي كسلخانه سيده قرنطينه بولگن ايككنچي شخص قيته ساغليك ني حاصل قيليب بوكون اويي گه جونتيلدي.”
فهيم جنابلري ني بيلديريشيچه ساغلگن شخص ٢٣ ياشده بولگن ايركك دير و ١٨ كون كويد١٩ شفاخانه سيده قرنطين ده ايدي.
بلخ ولايتي عامه ساغليك اداره سي تمانيدن نشر ايتيلگن رقملرگه كوره كرونا ويروسي مملكت ده ييرلگن دن حاضرگه قدر مزارشريف ده ١١ مثبي واقعه رويخط ده آلينگن، بوندن اوچ كيشي جاني ني قولدن بيرگن و ايككي كيشي هم ساغلگن.
بلخ عامه ساغليك اداره سي مسوللريني ايتيشيچه حاضرگه قدر ١٤٤٣ كيشي كرونا ويروسي سينوي اوچون بو اداره گه مراجعت ايتكن. بو رقم دن يالغيز٧١ كيشي شبهه لي بوليب اولردن نمونه آلينگن.فهيم جنابلري، آلينگن نمونه لردن ١١ كيشي نتيجه سي مثبت ايكن. بونگه علاوه بو اداره مسوللري حاضرچه ٩ شبهه لي واقعه لابراتوار ده و نتيجه سي تيزليكده انيق لنه دي ديب ايتكن.
كرونا ويروسي ني انيق لنتيروچي مركزي اوتكن هفته مزارشريف ده عامه ساغليك وزيرليگي تمانيدن خلق ارا ساغليك ني سخلش تشكيلاتي ياردمي بيلن ايجاد بوليب فعاليت باشله گن.
بلخ ولايتي عامه ساغليك اداره سي مسوللري بومركز هر كوني ٣٠ نمونه ني انيق لنتيريش ظرفيتي گه ايگه دير ديديلر.بوندن سونگ مملكت شمالي و شمالشرقيده جايلشكن ولايت لرنينگ شبهه لي نمونه لري بومركزده جونتيله دي.پايتخت كابل، هرات و ننگرهار دن سونگ بو تورتينچي مركز دير كه مملكت ده فعال بولگن.
معلوماتلرگه كوره ايرته ( چهارشنبه٢٠حمل) بلخ ولايتي ده قرنظينه ني اوچنچي باسقيچي عملي بوليشي ريجه لنگن. بلخ ولايت حاكمي سوزچي سي منير فرهاد بيرخبرنامه ني نشر ايتيب ” كرونا گه قرشي كورش كميته سي قراريگه كوره قرنطينه ني اوچنچي باسقيچي ايرته چهارشنبه ٢٠ حمل كونيدن مزارشريف و برچه تومن لرده اجرا ايتيليشي دن خبربيردي.”
خبرنامه ده شونينگ ديك داروخانه لر،اون ،گاز، ميوه و آذوقه ساتوچي دوكانلر و مخابرات شبكه لريدن باشقه برچه صنف لر فعاليتي توختتيليشي تاكيدلنگن.
باشقه تماندن بلخ امنيه قوماندانليگي ايرته دن مزارشريف شهري و برچه اولسوال ليك لرده نقليه واسطه لر فعاليتي منع ايكني ني اعلان ايتكن.بلخ پوليسي مسوللري بو چيكلولرگه اعتنا قيلمگن كيشيلرگه نسبتا”قانوني مناسبت كورستيليشي دن آگاهلنتيرگن.
