طالبان گروهي و افغانستان حكومتي علاحيده پياملرده هيت نينگ اوچ كونيده آتش كيسيم اعلان ايتيب بيربيرولريگه قرشي تعرضي هجوم اويشتيرمسليك لري دن خبر بيرديلر.

طالبان گروهي سوزچسي ذبيح الله مجاهد اوتكن اقشام ( شنبه اوچينچي جوزا) بير خبر نامه نشرايتيب بو گروه رهبريتي برچه جنگچي لريگه، مملكت يشوچيلري هيت كونلريني تينچ اوتكزيش اوچون هيت نينگ اوچ كونيده آتش كيسيم رعايه ايتش ني حكم قيلگن ديب يازگن.مجاهد جنابلري شونينگ ديك علاوه ايتكن طالبان جنگچي لري ، حكومت كوچلري تمانيدن هجوم اويشتيريلگن تقديرده اوزلريدن مدافعه قيليش ده حقلي ديرلر.

طالبان رهبريتي عيني حالده بو خبرنامه ده اوز قوتلريدن طلب ايتكن كه هيت كونلريده دولت حاكميتي آستيده بولگن جايلرده بارمسين و حكومت خوفسيزليك قوتلريگه طالبان نظارتي آستيده بولگن منطقه لرگه كيليش گه هم اجازت بيرمس ليگي ني تاكيد لشكن.

باشق تماندن افغانستان دولتي بوگروه حركتي ني آلقيشلب هيت كونلريده آتش كيسيم اعلان ايتكن.

افغانستان جمهورريسي محمد اشرف غني اوتكن اقشام بير قيسغه پيام ده ايتكن:” مين قوراللي قوتلر باش قومانداني اوله راق برچه امنيتي و مدافعوي قوتلرگه هيت نينگ اوچ كونيده آتش كيسيم ني رعايه ايتيش و فقط طالبان هجوم اويشتيرگن تقديرده اوزلريدن مدافعه ايتسين لر.”

شونينگ ديك افغانستان ده گي ناتو قوتلري هم افغانستان حكومتي و طالبان تمانيدن هيت كونلريده اعلان بولگن آتش كيسيم ني آلقيشلب صلح و تينچليك افغانستان ملتي نينگ اساسي آرزوسي ايكني ني تاكيدلشكن.