Screenshot_20210525-110017_WhatsApp

لیلا رحمانی؛ بدخشان ده یارقین کیله جکده امیدلی کورشچی عیال

neshananews

25 May 2021

هرچند اویدن تشقریده ایشلش عیاللر اوچون قیینت و مشقتلی دیر، اما تانگ ایرته‌لب دن آقشام گه چه چیکسیز اشتیاق بیلن تجارت و مدني ایشلر ساحه سیده فعالیت قیلیب اوز آرزو و طلب لریگه قول تاپیش اوچون محنتچی عیاللر سانی مملکت ده آز ایمس. بوندای عیاللر کوزلگن مقصدلریگه قول تاپیش اوچون هیچ قندای توسیق لرگه بهابیرمی سعي و حرکتلرینی دوام ایتیره دیلر.

لیلا رحمانی آنه شندای خصوصیت گه ایگه بولگن عیاللردن بیری دیرکه بدخشان ده حیات کیچیره‌دي. او اون ییل دن بیری پامیری تیللر بویچه تحقیقات بجریش دن علاوه تجارت و سودا ساحه سیده هم فعال دير. خانم رحمانی فارسی تیل و ادبیاتی ساحه سیده عالي تعلیمات گه ایگه. اوني کونده‌لیک ایشلریدن بیرقسمی پامیری تیللر بویچه تحقیقات گه اوتسه باشقه

بیرقسمی ني ایسه تجارت بیلن شغللنه دي.

لیلا رحمانی اصلده شغنان تومنی یشوچیسی دير، اما کوپ مدت دن بویان عایله سی بیلن بدخشان مرکزی فیض‌آباد شهریده حیات اوتکزه‌دي. خانم رحمانی شغنانلیک بیرقطار فرهنگی لر بیلن “ثمر” ناملی بیر موسسه بیلن همکار دير.

ثمر بیر خلق ارا موسسه دير که محلی تیللر خصوصن پامیری تیللرده یازمه اثرلر ايجاد ایتیش بویچه فعالیت قیله‌دي. بو موسسه قریب اون ییلدن بویان ّپامیری تیللر( شعنی، منجی، روشانی، سنگلیجی و اشکاشمی ) ساحه سیده بیر قطار یازوچی و فرهنگی لر بیلن، شعر، حکایت و تاریخی یازمه اثرلر یازیش ده اعتبار فعالیت قیلماقده.

لیلا رحمانی شغان تومنی مدني سیمالریدن بیری دیرکه شغنانی تیلیده یازمه اثرلر یرتیب و باشقه لر یازگن متنلرنی کوریب چیقیب اصلاح قیله دي. اوني بوندن مقصدی ایسه شغنانی تیل و ادبیاتی ني رواجلنتیریش و تکاملشتیریش دير.

خانم رحمانی ديدي باله‌لیک دن تجارت گه اشتیاقی کوچلی بولیب و شونینگ اوچون ادبیات ساحه سیده ایشی کوپ بولگنی گه قره‌می بیر درآمدلی ایشنی تنلش بیلن بیرتماندن مدنیت و فرهنگ گه خذمت قیلسه و باشقه تماندن اقتصادی فعالیتلر ساحه سیده اوز حضورینی تثبیت قیلسه.

لیلا رحمانی رسمی و تجارت بویچه فعالیتلر یانیده تورت فرزندانی تربیه‌لش و آوی ایشلری مسوولیتی گه هم ایگه دير. اما او انرژی و اشتیاق بیلن اوز فعالیتلری رواج رونق بیریش اوچون دایمی سعی و حرکت دن سوزلیدی.خانم ليلا سونگی وقتلرده کوپراق سعی و حرکتی ني تجارتی فعالیتلرگه قرتگنی دن سوزلب بو یولدن عایله سي روزغارینی تامینلشدن علاوه ایش قدریب یورگن عیاللرگه درآمد زمينه سينی مساعد ایتیش نی هم اوزیگه مقصد قیلگن.

او هرکونی فرهنگی فعالیت‌لرینی ثمر دفتریده و تجارتی ایشلرینی فیض‌آباد ینگی شهریده جای‌شان عیاللر تجارتی مرکزیده آلغه سوریب فارسی و پشتو تیللر بویچه تازه‌لیکده مطالعه و تحقیقات باشلگنی دن معلومات بیردی.

خانم رحمانی، اگر عیاللر فعالیتلری یولیده‌گی توسیق لر و عنعنوی عرف وعادتلر برطرف ایتیلسه، عیاللرهم ایرککلر کبی ایشلب مملکت اقتصادی ترقیاتیده ارزگولیک رول اینه آله‌دي ديدي.

لیلا رحمانی بدخشان نینگ اسماعیله مذهبیگه منسوب عایله ده توغیلگن که عیاللرنی تعلیم و ایشلشی بویچه هیچ قندای توسیق و چیکلولرگه اعتنا قیلمیدی. اما اوني بدخشان مرکزی فیص‌آباد شهریده کون کیچیریشی و اقتصادی فعالیتلرنی بالشی بیرقطار تشویشلر بیلن یولداش بولگن. لیلا خانم، برچه قیینتچیلیک لرگه قره‌می اوز فعالیتلریدن قول تارتمسلیک گه قرار الگنمن دیب و باشقه بیرقطار عیاللر بیلن اقتصادی و مدني فعالیتل ني کینگیتیریش اوچون ایشلریم ني دوام ایتیره‌من دیب تاکیدلشدی.

بو سوداگر عیال اگر تینچلیک مذاکره لر نتيجه بیرسه و افعانستان ده دایمی تینچلیک وبرقرارلیک تامینلنسه کوپلب عیاللرگه ایش زمينه سيني مساعد ایتیشده شبهه‌سیز موفق بوله‌من دیب ایشان بیلدیره‌دي.

باشقه تماندن بدخشان ولایتی عیاللر ایشلری اداره‌سي هرچند سونگی ییللرده عیاللر اقتصادی فعالیتلری رواج رونق تاپیشیگه امیدبیلدیره دي اما سونگی وقتلرده امنیتی تهدیدلر و ناقرارلیکلر کوپگیگنی آرتیدن تشویش و خواتیر بیلدیره‌دي.بدخشان عیاللر ایشلری اداره‌سي، بو اداره محلی دولت ارگانلری همکارلیگی بیلن کسبه‌کار ، ایش یرتوچی عیاللر، مدني و عیاللر حقلریدن حمايت ایتوچی عیاللردن حمايت و ارقه‌داشتیم کورستیش ني اوز ایشی سرلوحه سیده جایلشتیرگنی دن خبر بیرگن.

بدخشان ده عیاللر حقلریدن حمايت ایتوچی فعاللر، صلح پروسه سیده عیاللر کسب ایتکن یوتوقلرنی قولدن بیریش و بو قتلم ایشلریده بوندن کوره کوپراق چیکلولر و توسیقلر ايجاد ایتیلیشی دن تشویشده ایکنلیکلرینی تاکیدلیدیلر؛ چونکه اولرگه کوره خارجی قوتلرنی افعانستان دن چیقیشی بیلن عیاللر حاصل قيلگن یوتوقلر جدي تهدیدلرگه یوزمه یوز بولیشی دن تشویشده دیرلر.

اما خانم لیلا حاصل بولگن یوتوقلردن آرقه گه قیتیش بیز عیاللر اوچون قبول قیلینرلی ایمس ديدي و مملکت عیاللری بیر عمومی اتفاق بیلن و اوز حق حقوقلریدن بیر ییریک روايت ايجاد ایتیلیشی ني کوتیب عیاللر فعالیتی ني چیکلنتیره‌یاتکان هرقندای تهدیدگه قرشی کورشیش لری لازم ديدي.