بادغيس ولايتي مقر اولسوال ليگي ده امنيتي قوتلر و طالبان جنگچي لري ارا يوزبيرگن توقنشوده اوچ محلي پوليس اولديريليب و آلتي پوليس هم ياره لنگن.

بادغيس ولايتي امنيه قوماندان ليگي امنيت آمري شيرآقا الكوزي گه كوره بو توقنشو اوتكن يريم كيچه مقر اولسوال ليگي نينگ “چشمه دزدك”منطقه سيده يوزبيرگن. الكوزي جنابلري طالبان هجومي دن سونگ بو توقنشو بيش ساعت دوام ايتكني ني ايتي.

بادغيس امنيتي مسوللري شونينگ ديك بو توقنشوده طالبان جنگچي لريگه هم اغير تلفات يتكزيلگني ايتيب اما بو تلفات انيق رقمي ني رسانه لر بيلن شريك قيلمه ديلر.

طالبان گروهي حاضرگه قدر بو باره بيران خبر نشر ايتمگن.

بادغيس ولايتي غربيده جايلشكن مقر ، بو ولايت نينگ ناتينچ تومنلريدن بوليب طالبان قوراللي لر بو تومن نينگ ايريم حدودلريده فعال ديرلر.