مملكت شماليده گي امنيتي قوتلر مسوللريگه كوره سرپل ولايتي ” گوسفندي” اولسوال ليگي ده امنيتي قوتلر و طالبان ارا يوز بيرگن توقنشوده بوگروه نينگ ” ملاسردار” ناملي قومانداني ٦ جنگچي سي بيلن بيرگه اوتكن كيچه ( دوشنبه ٨ ثور) اولديريلگن.

شاهين قول اردو سي مطبوعات مسولي محمد حنيف رضايي نشانه خبر آژانسي بيلن صحبت ده ديدي:”اوتكن كيچه طالبان جنگچي لري و امنيتي قوتلر ارا يوز بيرگن توقنشو قريب ايككي ساعت دوام ايتي.بو توقنشو عاقبيتيده طالبان گروهي قومانداني ملاسردار ٦ جنگچي سي بيلن اولديريلدي.”

رضايي جنابلري بو جنگ نتيجه سيده شونينگ ديك طالبان نينگ بيش جنگچي سي جراحت كوريب باشقه لري اوروش ميدان قاچيشگه مجبور بولگن. شاهين قول اردوسي مطبوعات مسولي بو توقنشوده امنيتي قوتلرگه هيچقنداي صدمه يتكزيلمگن ديدي.

بونگه علاوه طالبان جنگچي لري جوزجان ولايتي “منگجبيك” اولسوال ليگي نينگ امنيتي پوسته لريگه هم هجوم اويشتيرگنلر. جوزجان ولايت حاكمليگي مطبوعات دفتري باشليغي عبدالمعروف آذر نشانه خبر آژانسي بيلن صحبت ده ديدي:” طالبان گروهي كيچه ساعت ايككي بامداد ده منگجيك تومني امنيتي پوسته لريني تصرف ايتيش اوچون هجوم اويشتيرديلر اما بو هجوم امنيتي قوتلر تمانيدن دفع ايتيلدي.”

آذر جنابلري بو توقنشوده طالبان گروهي ٦ جنگچي سي هلاك بوليب ٤ نفري هم جراحت آلگن ديدي.

بو اوروش ده امنيتي قوتلردن ايككي كيشي اولديريليب و ٣ عسكرهم جراحت كورگني ني جوزجان ولايت حاكمليگي مطبوعات مسولي تصديقلشدي.