كابل امنيتي مسووللر، اون ايككينچي امتيتي حوزه ده بير مقناطيسي ماين پارتلشي تورت كيشي ني ياره لنتيرگني دن خبر بيرگن.

كابل ولايتي امنيه قوماندان ليگي سوزچيسي فردوس فرامرز، بو پارتلش بوكون ايرته لب( چهارشنبه ٥ قوس) ساعت ٠٧٠٣٥ دقيقه ده اون ايككينچي امنيتي حوزه گه تيگيشلي ( امنيت شهرچه ) سيده يوز بيرگن ديدي.

فرامرزجنابلري بو واقعه ده ايككي عادي اهالي و ايككي امنيتي ملازم ياره لنگن ديدي.

كابل پوليسي سوزچيسي بو واقعه بير فورد نقليه واسطه گه جايلشتيريلگن ماين پارتلشي نتيجه سيده يوز بيرگن ديب ايتكن.

حاضرگه قدر بو واقعه مسوليتي ني هيچ كيم اوز بوينيگه آلمگن.

سونگي كونلرده ماين لر پارتلش واقعه لري مملكت ده كوپلب يوزبيرماقده. اوتكن كوني باميان ده يوز بيرگن ايككي پارتلش ده اينگ آز اون بيش كيشي جان بيردي و قريب ٥٠ كيشي ياره لندي. بو حادثه اكثر قربانلري عادي اهالي بولگن.