بادغيس ولايتي ملي اردو مسووللري، بو ولايت نينگ بالامرغاب تومنيده ملي اردو قوتلري قرارگاهيده هاوان اوقي تيب پارتلشي سبب اوچنچي لو اركان ريسي اوز جاني ني قولدن بيرگني ني تصديق لشكن.

بادغيس ده گي ملي اردو بوتلري اوچينچي لوا قومانداني حسيب الله مسعود آخندزاده، اوتكن كيچه ( يكشنبه ٩ قوس) ملي اردو قوتلريني بالامرغاب ده گي قرارگاهيده بير هاوان اوقي تيب پارتلشكن و اوني نتيجه سيده لوا نينگ اركان ريسي عبدالبصير عثماني اوز جاني ني قولدن بيريب و اردو ملازملريدن سكيز كيشي ياره لنگن ديدي. آخندزاده جنابلري بو هاوان طالبان تمانيدن آتيلگني ني تاكيدلشدي.

ملي اردو اوچينچي لوا قوامانداني گه كوره اركان ريسي جنازه سي بادغيس مركزيگه انتقال بيريلگني دن خبر بيريب عيني دمده بو حادثه ده ياره لنگن اوچ كيشي نينگ ساغليك احوالي آغير ايكني ني ايتكن.

طالبان حاضرگه قدر بو باره ده بيران نرسه ايتمگن.

بادغيس مركزيدن يوز كيلومتر اوزاق راقده جايلشكن بالامرغاب تومني بو ولايت نينگ استراتيژيك اولسوال ليكي دير. بو تومن مملكت شمالي ني غربي ولايت لر بيلن باغلوچي شاه يول حدوديده جايلشكن. بونگه علاوه بالامرغاب تومني مملكت شمالغربيده طالبان مهم مركزي بولگني ايتيلگن.