افغانستان دن چيت ده تحصيل قيليب يشه گن قيزلرني حياتي اوچ فرقلي بوليم دن عبارت دير، اوتميش ده گي خاطره لردن ناراضليك، حاضرگي كونلر اضطرابي و كيله جكده ناراضليك خاطره لر تكرار بوليشي و اجتماعي چيكلولر.

برچه سعي و حركتلربيلن مملكت دن چيت ده خصوصا” كوپراق آزادليگي بولگن مملكت لرده عالي تعليم كوريش اوچون فرصتلردن فايده لنگن قيزلر، حاضر تعليماتلري ني بيتيرگن دن سونگ بو مملكتلرني ترك ايتيب و افغانستانده حيات كيچيريش اولر اوچون اونچه ليك قيزيق ايمس. چونكه نيچه ييل ميزبان بولگن مملكت بو قيزلرني حيات گه نسبتا قره ش لريني اوزگرتيرگن و ييللرچه آنه يورتلريده اجتماعي چيكلولر،جنسيتي تبعيض و تورلي خيل اذيت لرني چيدب، ايندي اوتميشگه قيتيش ني ايسته مي و بيز حيات كيچيريش اوچون توغليگن ميز و اسارت ني چيده آلمي ميز ديب ايتماقده لر.

نيلوفر ابراهيمي افغانستان قيزلري نينگ انه شو نسلي ني نماينده سي دير. او موفقيت جوقيسيگه ايريشيش ني استه سيكين گيزكن و ايندي ليكده ماسترليك درجه ني كسب ايتيش بيلن ميزبان مملكت ده قاليش يا باشقه بير رواجلنگن مملكت ده باريش يا آنه يورتي افغانستان گه قيتيش يوليده شك و شبهه گه دچار بوليب قالگن. بو ياش قيز حياتي نينگ ٢٤ بهاري افغانستان ده گي حاكم عرف وعادتلرگه قرشي كورش ده اوتيب و فقط ايككي ييل دير كه اوق آوازيني تينگله مگن و كوزي آلديده پارتلش سبب بير انسان جسمي تكه پرچه بولمگن.

نيلوفر حاضرچه ماسترليك دوره سيني اوتكزگندن سونگه هندوستان ده حيات كيچيرماقده، او ديدي آنه يورتيم گه قيتيش اوچون يوره گيم اشتياق دن تولب تاشكن بير پيت ده، توستدن افغانستان ده عياللر قرشي سيده تورگن معما و غم و قيغو بوتون وجودمني اورب آله دي.” قالي مي؟ قيتي مي؟ باشقه بير مملكت گه مهاجرت قيلي مي؟ و قنداي آنه يورتيم قيزلرني مذهبي افراطي لر چنگاليدن قوتقريش ده ياردم بيري؟” بو سواللر هر كوني ٢٦ ياشده بولگن نيلوفر ذهني ني قمرب آلگن. هرچند وطني ده خوش ويخشي كونلرني آز كورگن اما وطنداشلري برابريده هلي هم مسوليت حس قيله دي. نيلوفر ديدي دنياگه كيلگن زمانده آنم ني اله سيني ايشيتكندن آلدين راكت و ملتيغ اوقي آوازي روحم ني ازرده قيلگن. نيلوفر بيش ياشليگي گه چه اوغيل باله لر كيمي ني كييرايكن. چونكه آته و آنه سي عايله ده اوغيل باله يوق ليگي ني حس قيلمه سين و باشقه تماندن نيلوفر كوچه ده باشقه باله لر بيلن اوينه آلسين.  نيلوفر ابراهيمي قيسي زمان قيز و ايركك باله ارا فرق ني توشينگني بويجه سورلگن سوالگه عايله سي بيلن كابل شهريده يشه ياتگان كونلرني ايسگه كيلتيريب بونداي جواب قيتره دي؛ مكتب ده تورتينچي صنف ده درس اوقيش چاغيده مردم قيز و اوغيل فرزندلري ارا فرق قويش لريني انگله ديم. نيلوفرني او دوران دن خوش خاطره سي يوق، او ديدي كابل كوچه لري و مكتب يوليده اوغيل باله لرني قيزلرگه نسبتا” ايته ياتكان كتره كنايه لري، ديمك قيز و عياللر قربان بولگن قتلم ايكني حسي ني اونچه ليك قوللب قوتلدي كه ديمك برچه عياللرني تقدير شنداي ايكن ديب توشنرديم.

اما بونداي اچنرلي شرايط ني اوزگرتيريش ده موفق بوليشي بيلن عايله سي نينگ هرات گه كوچگني ينه بيربار اوني ينگي و جدي معمالرگه دچار قيلدي. اوني ايتيشيجه هرات ده كوچيب بارگني ميزني بيرينچي كونلريده گي حيات، شوكلنتيروچي ايدي و آيلر و حتي نيچه ييلگه چه هرات نينگ بغايت عنعنوي شرايطي بيلن ماس كيله آلمديم.

نيلوفر ديدي عايله سي نينگ دايمي حمايتي بولمگنده هرات شرايطي بيلن موافق بوله آلمسديم، چونكه بو شهرده كوپلب افراطي و مذهبي گروه لر فعاليتي سبب قيزلر ترقي تاپيشي گه هيچقنداي فرصت مساعددايمسدي و موجود شرايط ني اوزگرتيريش اوچون هرقنداي اعتراض بو مذهبي و افراطي گروه لرني جدي مناسبتي گه سبب بولردي.

هرات ده بوگروه لرني كوچ و قدرتي كون اوتيشي بيلن كويب بارماقده و دولت نينگ اولرگه نسبتا” يومشاق مناسبتي اولرني كوچيتيرماقده.اما يالغيز بو اجتماعي چيكلولر و قيينتچيليكلر سبب نيلوفر بير موفق قيزگه ايلنيشي گه سبب بولمه دي بلكه اوشه باله ليك دوريده قالين توقيش كارگاه ده ايشلشي اوندن بير محنتكش و عايله اقتصاديگه ياردمچي بولگن قيز تربيه لشدي.

نيلوفر ديدي باره باره سعي و حركتي سبب كورش يوليني تاپديم و مكتب و عالي اوقويورتده درسلريمني دوام ايتيريش بيلن بيرگه محلي رسانه لرده هم ايشلش گه موفق بولديم.او عيني زمانده درس اوقيش و ايشلشي سبب كابل ده تيكين تحصيل قيليش و سونگره هندوستان ده ماسترليك اوقيش اوچون فرصت مساعد بولگني گه ايشانچيم كامل ديدي.

او ايندي ماسترليگي ني تمام قيلگندن سونگ هرات گه قيتيب كيليش و بوشهرده حكم سوره ياتكان عنعنعوي چيكلولرني چيدش فكري ينه هم اوني ضعيف لشتيريب و شك و شبهه لريني كوپيتيرگن.

هرات ده يشه گني دن اچيغ خاطره لري بولگن خانم نيلوفر ديدي ايريم وقتلر هرات ده ساده بير قدم اوريش اوچون دوستلري و قرينداشلري بيلن يولداش بولشگه مجبور ايديم، چونكه يكه بولگنده مردم نينگ سوزلري و اذيت لري چيدب بولمس ايدي. او علاوه ايتي هرات ده بولگنيم ده گاهي وقتلر قول تلفني هدفوني آوازيني، مردم و يولوچيلر سيسي ني ايشيتمسليك اوچون كوپ ليك بلند قيلرديم، بو وضعيت ني هيچ قچان هندوستان گه تجربه قيلگنيم يوق و بو اولكه ده گي فكر و انديشه آزادليگي و قومي، تيل و مذهبي تعصب بولمگني، افغانستان ده قيتيب باريشي ني منگه بي مزه قيلگن ديدي.

اما ايلديز دن اجرلش ممكن مي؟

نيلوفر اوچون، افغانستان ايلديز و ريشه دير چونكه اوني حياتي انه يورتي گه باغليق دير. نيلوفر ديدي باشقه بير مملكت گه باريش و اومملكت گه قاليش اونگه يوقاليش معني سيني انگلته دي، اما اوزگريش گه ايشانچي كامل دير.

بو هراتليك ياش قيز ديدي قيته اوز مملكتي كه بارماقچي و علم ، بيليم و تجربه سيدن فايده لنيب قيز وطنداشلريني بو ناقولي شرايط و عنعنوي عرف و عادتلر چنگاليدن قوتقريش اوچون ياردم بولماقچي. چونكه اكثر عياللر تقدير ميز شنداي ايكن ديب بو شرايط ني قبول قيلگن اما باشقه بير قطار قيز و عياللر، تحصيل قيلگن و مهارتلي عياللر، هرات ده گي مذهبي راديكال گروه لرني هرقنداي افراطي عمللري قرشي سيده كتته توسيق دير. بو نسل ساني هركوني كوپيب بارماقده و قدرتلري هم انكار قيليب بولمس دير.