جوزجان ولایتی محلی مسووللریگه کوره بو ولایت نینگ خانقا تومنی ده « تینچلیک و اطراف محیط » بیرکونلیک مباحثه سی قوم وقبیله لرو اطراف محیط نی سقلش اداره لری همکارلیگی بیلن یولگه قویلگن. مسووللر بو دستور یولگه قویلیشی دن مقصد، صلح قندای تامین لنیشی و اوروش جریانیده اطراف محیط گه یتکزیله یاتکان صدمه لرحقیده محلی رسمی لر و اهالی اورته سیده مباحثه بولیشی دیر ديب ايتكن.

جوزجان ولایتی اطراف محیط نی سقلش اداره سی ریسی خجسته تلاش بوکون ( دوشنبه ۲۰ اسد ) نشانه خبرآژانسی بیلن صحبت ده دیدی: « بخت گه قرشی اوتکن ایگرمه ییل ده‌گی اوروش و ناقرارلیک لر اطراف میحط گه جدی صدمه لریتکزگن.» اونی معلوم قیلیشیچه سونگی اوروش لرسبب کوپلب باغ و ایکنزارلرنی اوتگه یانیب اطراف محیط گه صدمه یتکزگن. خانم تلاش گه کوره بو مباحثه تشبثکارلری مردم بیلن قندای صلح تامین لنیشی و اطراف محیط نی قندای قیته قوریشی حقیده فکر المشتیردیلر.

عینی حالده خانقاه تومن حاکمی محب الله هم، بو تومن یشوچیلری، تینچلیک ضرورتی وقندای تامین لنیشی باره سیده اوز نقطهء نظرلريني محلی حکومت مسووللری بيلن اورتاقلشه ديلر ديدي. خانقا تومن حاكمي ني علاوه قيليشيچه حاضرچه ليك بو اولسوال ليك ني بيرقطار قشلاقلري اعلان ايتيلمگن صلح حالت ني اختيار قيلگن. او، محلي اقسقال لر ارلشيشي بيلن خانقا تومني نينگ بيرقطار قشلاق لريده اوروش توختتيلگن. محبت الله جنابلريگه كوره اوروش توختتيليشي نتيجه سيده اهالي نينگ دهقانچيليك گه رغبتي كوپيگن و حاضرچه بو تومن عياللريگه ٤٠ سبزخانه لر ايجاد بولگن. خانقا تومن حاكمي ني معلوم قيليشيچه بو باغچه لرني ايجاد ايتيليشي اطراف محيط وضعيتي گه بيواسطه مثبي تاثير يتكزگن.

باشقه تماندن خانقاتومني نينگ مردمي كينگاشي ريسي عبدالوفاعثماني بونداي دستورلرني يولگه قويليشي خصوصا صلح حقيده قشلاق لرده صحبتلش مردم نينگ اساسي ضرورتي دير ديدي. اوني معلوم قيليشيچه جوزجان اهالي سي اوروش دن خسته بولگن. عثماني جنابلري طالبان گروهي دن برادركشليك و انسان كشليك دن قول تارتيشلريني ايستب بيربيرلريني قاني ييركه توكيش اورنيده ييرگه بوغداي ايكينگلر ديدي.

عيني حالده خانقا تومني نينگ بيرقطار يشوچيلري هم بيش ييل دن بيري بو تومن اوروش اوتي گه كويب باريشي ني ايتيب بو منطقه اهالي سي برق و ساغلان ايچيمليك سودن محروم بوليب حتي دهقانچيليك اوچون سوگه محتاج ميز ديب ايتكنلر.خانقا تومن يشوچي سي خداي بيردي صلح تامين لنيشي دن سونگ دولت بو تومن يشوچيلريگه اعتبار قرتيش ني اميد قيلگن. او محلي حكومت ملازم لريدن بوتومن اهالي سي نينگ ايچيم ليك و دهقان چيليك سوگه بولگن ضرورتلريني برطرف ايتيش ني طلب ايتكن.

خانقا تومني شبرغان – مزارشريف شاه يولي حدوديده جايلشكن كه هر كوني يوزلب نفت و يوك تاشوچي نقليه واسطه اونده قتنيدي.