جوزجان ولايتيدقاچقينلر اداره سي مسوللري، جاري ييل اولي دن حاضرگه قدر قريب اوچ مينگ آواره اسملريني رويخط ده آلينگني ني اعلان ايتكن.رسميلر حاضرگه قدر ايككي آواره گه ييمليك ماده لر و باشقه اسباب اسكونه لر ترقتيلگن ديب ايتكن.

جوزجان ولايتي قاچقينلر اداره سي ريسي عبدالمالك رستمي نشانه خبر آژانسي بيلن صحبت ده ديدي :” آواره لرگه ترقتيلگن ياردملر ييمليك ماده لر، اوي اسباب لري. ساغليك ني سقلش ماده لري و باله لرگه ضرورت بولگن اشيالر بولگن و بيرقطار نادولت موسسه همكارليگي بيلن بو اداره تمانيدن ترقتيلگن.”

رسمتي جنابلري باشقه آواره لرگه ياردم لر ترقليشي دوام ايتيب باريشي دن خبربيرگن. اوني معلوم قيليشيچه اوتكن بيريريم ييل جريانيده بو آواره لر اوچون جوزجان ولايتي نينگ تورلي منطقه لريده تورت سو يتكزيش ترماقي قوريليب و قريب بيش مينگ عايله ني ايچيمليك سويي ني تامين لنگن.

جوزجان ولايتي مهاجرلر اداره سي ريسي، بو اداره همكار موسسه لر مالي ياردمي بيلن ٥٠٠ عايله گه تورلي خيل فن اورگتكن ديدي. رستمي جنابلري، عمومي كوچه لرگه جغل توكيش، سوترماقليني قوريش، ساغليك ني سقلش كلينيك ايجاد ايتيليشي،باله لراوچون دم آليش محل لرني ايجاد ايتيش و مسجد قوريش ني بو اداره تمانيدن آواره لر اوچون بجريلگن باشقه ايشلر جمله سيدن بولگني اورغولشكن.

عيني حالده آقچه تومني ده يشه ياتكان اواره لردن بيري محمد مير عزيزي ديدي:” بير يريم ييل دن بويان ” نورآباد” شهرچه سيده كوزگه كورنرلي ايشلر بولگن.” او علاوه ايتي نورآباد شهرچه سيده بيش يوز دن كوپراق آواره عايله لر حيات كيچيريب آواره لر باله لري اوچون دم آليش پارك، مكتب و سو ذخيره سي قوريلگني بيلن اما هنوز هم اواره لر ساغليك ني سقلش مركزي بولمگني و مكتب ايشي تمام بولمگني دن قينلماقده لر ديدي.

باشقه تماندن قاچقينلر اداره سي مسوللري بو شهرچه ده ساغليك ني سقلش مركزي نينگ قوريليش ايشي ٨٥ آلغه سوريلگني و تيزليك ده فايده لنيش گه تاپشيريليشي ني تاكيد لشكن.

جوزجان ولايتي بيرقطار تومنلري و قوشني ولايت لرده اوروش دوام ايتيب باريشي سبب كوپلب عايله لر جوزجان مركزي و آقچه تومنيده پناه كيلتيريش گه مجبور بولگنلر. جوزجان ولايتيدقاچقينلر اداره سي معلوماتيگه اساسا” سونگي ايككي ييل جريانيده اون مينگ دن كوپراق آواره لر فارياب و سرپل ولايت لري و جوزجان ولايتي نينگ ناتينچ تومنلريدن بيجا بوليب شبرغان شهريگه پناه آلگن. بو اداره رسميلريني ايتيشيچه هربير عايله گه اينگ آز  بير بار ٢٠ مينگ افغاني گه تينگ ييمليك ماده لر ترقتيلگن.