سرپل ولايتي معارف اداره سي مسووللري گه كوره جاري ييل ده سرپل يشوچيلريدن بيري مكتب قوريليشي اوچون اوچينچي مراتبه شخصي ملكيتي ده معارف اداره سيگه يير وقف قيلدي. رسميلرگه كوره حاجي محمد عظيم سلطان زاده بو بار شخصي ملكيتي دن قريب ايككي مينگ مترمربع ييرني سرپل مركزيده معارف گه ساوغه بيرگن.

سرپل ولايتي معارف اداره سي ريسي احمدخان بيك زاده نشانه خبر اژانسي بيلن صحبت ده ديدي حاجي عظيم سلطان زاده بو ييرني شخصي پولي دن ساتيب آليب كين اوني معارف اداره سيگه بغيشلشكن. بو يير نرخي بيرميليون و آلتي يوز مينگ افغاني تخمين بولگن. بيك زاده جنابلريگه كوره بو مكتب سرپل شهري مركزيده جايلشكن ” نوآباد قاضي كينتي” قشلاقيده قوريلماقچي. بو قشلاق نينگ اكثر يشوچيلري اوروش سبب آواره بوليب كيلگن عايله لردن عبارت دير.

معارف اداره سي ريسي، بو مكتب اوروش و طليعي حادثه لردن صدمه كوريب اواره بولگن عايله لر فرزندلري اوچون قوريليشي ريجه لنگن. اوني معلوم قيليشيچه حاضرچه ليك بو محل ده يشه ياتكان عايله لر فرزندلري بو منطقه اوزاق بولگن مكتب لرده درس اوقيب كوپچيليك لري ايسه درس و مكتب دن محروم ديرلر.

باشقه تماندن سرپل ولايتي معارف اداره سي حاجي سلطان دن “معارف پرور ” انسان اوله راق يادلب قدردانليك اظهار ايتكن. سرپل ولايتي معارف اداره سي ريسي، بوندن آلدين هم حاجي عظيم سلطان زاده ايككي قطعه شخصي ييريني مكتب قوريليشي اوچون معارف اداره سيگه وقف قيلگندي.اونگه كوره حاضرچه حاجي سلطان زاده جنابلري معارف گه وقف قيلگن ييريگه قوريلگن مكتب ده بيرمينگ دن كوپراق قيز درس اوقيب سواد كسب ايتماقده. سرپل ولايتي معارف اداره سي معلوماتيگه اساسا” اوتكن ايككي ييل جريانيده بو ولايت يشوچيلري اوز شخصي ملكيت لريدن ١٣٠ قطعه ييرلريني معارف اداره سيگه ساوغه قيلگن لر.