سرپل ولايتي محلي رسميلريگه كوره بو ولايت نينگ سانچارك تومنيده جايلشتيرين ماين پارتلشي آلتي باله دن جان آليب و ايككي عيال ني ياره لنتيرگن. مسووللرني ايتيشيچه بو ماين طالبان حنگچي لري تمانيدن بو اويگه جايلشتيريلگن ايكن.

سرپل ولايت حاكمي سوزچيسي ذبيح الله اماني نشانه خبرآژانسي بيلن صحبت ده ديدي بو ماين اوتكن آقشام( چهارشنبه ١٢ سنبله) سانچارك تومني نينگ ” كجوا” قشلاقيده پارتلگن. اماني جنابلري كجوا قشلاقي بير ييل دن بيري طالبان گروهي نظارتي آستيده دير بولگني اورغولشدي.

عيني حالده سانچارك تومن حاكمي نقيب الله دقيق، سونگي كونلرده طالبان جنگچي لري اهالي يشه ياتكان محله لرده ماين و پارتلوچي ماده لر جايلشتيريش بيلن اهالي آره سيده قورقو و دهشت توغديريش ده يوزكيلتيرگن ديب عموما” طالبان گروهي عادي اهالي ني دولت بيلن همكارليك قيليش عبيلوي بيلن نشان گه توته ديلر ديدي.

دقيق جنابلريگه كوره نيچه وقت آلدين طالبان گروهي كجوا قشلاقيده بير شخص ني دولت بيلن همكارليك قيليش عيبلوي بيلن تيرباران قيلگنديلر.

جاري هفته جريانيده سرپل مركزيده هم بير كيكسه شخص هم ١٢ ياشده بولگن فرزندي بيلن يول چكه سيده جايلشتيريلگن ماين پارتلشي نتيجه سيده اوزجان لريني قولدن بيرگنديلر.