طالبان حکومتی آغدریلگنی دن سونگ کوکنارایکمی آلدینی آلیش ومخدره ماده لرگه قرشی کورش افغانستان حکومتی قرشی سیده تورگن اینگ اساسی معما حساب لندی. کوکنار ایکمی و ایشلب چیقاریلیشی آلدینی آلیش اوچون میلیون لرچه دالر افغانستان ده صرف لندی اما ناتینچ بولگن ولایت لر و ددولت نینگ قوراللی مخالف لری حاکمیتی آستیده بولگن منطقه لرده خشخاش ایکمی ، ایشلب چیقاریلیشی و استفاده سی کتته مقدارده حاضرهم دوام ایتیب بارماقده.

 کوکنار ایکمی و مخدره ماده لر ایشلب چیقاریلشی حاضرچه دولت قوراللی مخالف لری خصوصا طالبان گروهی نینگ اینگ کتته عایداتی منبع سی حساب لندی. اوتکزیلگن تحقیقات لرگه اساساٌ طالبان گروهی جنگچی لری مملکت نینگ شرقی دن غربی وشمالی دن جنوبی گه چه امنیتی قوتلرگه قرشی اوروش لرینی دوام ایتیرش اوچون مخدره ماده لر قاچاقی دن قولگه کیله یاتکان عایدات دن قوراللی جنگچی لرینی جهازلب و مالی جهت دن تامین لیدی.

 عینی حالده، سرپل ولایتی ده طالبان نظارتی آستیده بولگن منطقه لرده کوکنار ایکمی و مخدره ماده لر ایشلب چیقاریلشی کوپیگنی محلی حکومت رسمیلرینی تشویش گه سالگن. سرپل محلی مسوللری گه کوره جاری ییلده سرپل ده دوام ایته یاتکان اوروش و ناقرارلیکلر سبب کوپ ایکنزارلرده خشخاش ایکیلگن و بو گیاه محصولی اوتکن ییل گه قرگنده ایککی برابرکوپیشی ممکن. سرپل ولایت کینگاشی اورین باسری سیداسدالله دانش نشانه خبرآژانسی بیلن صحبت ده دیدی:« سرپل ولایتی توپراقی دن قریب ۷۰ فایزحدودی طالبان گروهی نظارتی آستیده دیر و فقط ولایت و اولسوال لیک لرمرکزی دولت اختیاریگه دیر.» اونگه کوره، طالبان نظارتی آستیده بولگن منطقه لرده، بوییل هروقت دن کوره کوپراق کوکنار ایکیلگن . دانش جناب لری علاوه ایتی:« سوزمه قلعه، سانچارک و صیاد تومن لری نینگ ایکنزارلری طالبان نظارتی آستیده دیربو منطقه لرده همه جای دن کوره کوپراق خشخاش ایکیلگن.»

عینی دمده سرپل ولایت حاکمی سوزچی سی ذبیح الله امانی هم نشانه خبرآژانسی بیلن صحبت ده دیدی:«سرپل ولایت حاکم لیگی گه یتیب کیلگن راپورلرگه مطابق جوزجان ـ سرپل شاه یولی حدودیدی، صیاد ، کوهستان، سوزمه قلعه و سانچارک تومن لری نینگ اکثر منطقه لریده کوکنار ایکلگن و محلی حکومت مخصوص عملیات لرنی یولگه قویش بیلن بو منطقه لرده ایکیلگن خشخاش ایکنزارلرینی نابود قیلیش ده قرار آلگن.» امانی جنابلری علاوه ایتی سرپل ولایتی پولیس قوتلری بو ییل اوتکن ییل لرگه قرگنده ، مخدره ماده لر قاچاق و ایکمی نی کوپ مقدارده آلدینی آلگن.سرپل محلی رسمیلری اما بو ولایت ده قنچه هکتار ایکنزارلرده کوکنار ایکیلگنی نی معلوم قیلمگن.

 ذبیح الله امانی علاوه ایتی طالبان اوزنظارت لری استیده‌گی منطقه لرده برچه دهقانلرگه کوکنار ایکیش گه رخصت بیرگن و محصولات قولگه کیلگن دن سونگ اونی مردم دن یغیب چیت مملکت لرگه صادرقیله دیلر. امانی جناب لری سرپل ولایتی ده کوکنار محصولاتی طالبان گروهی نینگ یگانه درآمد منبع سی بولگنی نی تاکیدلب دیدی طالبان مخدره ماده لردن قولگه کیله یاتکان مبلغ دن جنگچی لرینی جهازلب امنیتی قوتلرگه قرشی اوروشه دیلر.

سرپل ولایتی امنیه قوماندان لیگی معلوماتی گه کوره اوتکن بیرییل جریانیده پولیس ۵۰۰ کیلوگرام دن آرتیق مخدره ماده لرنی بو ولایت نینگ تورلی منطقه لریده یولگه قویلگن عملیات لری نتیجه سیده کشف ایتکن.

  سرپل پولیس قوماندان لیگی سوزچی سی نورآغا فیضی هم بو باره دیدی:« دولت نظارتی آستیده بولگن ساحه لرده حتی بیرجریب ییرگه هم کوکنار ایکیلمگن اما امنیتی تهدیدلر آستیده بولگن منطقه لرده طالبان گروهی مردم نی کوکنار ایکیش ده مجبور قیلگن.» فیضی جنابلری علاوه ایتی حتی ایریم منطقه لرده طالبان نینگ عشر و ذکات یغوچی مسوللری، طالبان تمانیدن کوکنار محصولاتی نی یغیش گه وظیفه لنتیریلگن کیشی لر بیلن پول تقسیمی بویچه جنجال لشیب توقنشگن لر.»

 سرپل ولایتی امنیتی مسوللرینی بیلدیریشیچه کوکنار محصولاتی سرپل ولایتی ده قولگه کیلگندن سونگ  فاریاب، هرات، غورو بلخ ولایت لریگه قاچاق بوله دی. سرپل پولیسی شویننگ دیک اوتکن بیر ییل جریانیده ۱۱ قاچاقچی بو ولایت ده قولگه آلینگنی دن خبر بیرگن. بو منبع شونینگ دیک بو قاچاقچی لر دوسیه لری حاضرچه مملکت عدلی و قضایی ارگان لرده کویب چیقیلماقده دیدی.

 هرچند افغانستان دهقانچلیک و چاروادارلیک وزیرلیگی هرییل کوکنار ایکمی اورنیده دهقانلرگه باشقه محصولات دن فایده لنیش یول یوروق لرینی تانیشتیریب دهقان لرگه زمانوی اسباب اسکونه و اصلاح بولگن اوروغ کمک بولگنی ایتکن اما ناتینچلیک، قشاقلیک و کوکنارایکیمی عایداتی کوپ بولگنی سبب دهقان لرمخدره ماده ایکیمی گه کوپراق قیزیقه دیلردیدی.سرپل ولایتی دهقانچلیک و چاروادارلیک اداره سی ریسی محمدسلیم رنجبر نشانه خبر آژآنسی بیلن صحبت ده دیدی:« بیز کوکنار ایکیمی اورنیده بدیل معیشت ناملی پروژه لرنی دهقانلرگه تکلیف قیلدیک بو پروژه ده ۷ علاحیده لایحه نظرگه آلینگن.» رنجبرجنابلری دیدی بو لایحه لر، مییزاوچون موزخانه لرقوریلشی، الویرا ، زغفران و هینگ محصول لرینی ایکیش دیر، اما بیرقطار دهقان لر بو محصولات نی ایکیش گه حاضربولمدیلر. اونگه کوره اکثر دهقانلر طالبان گروهی تمانیدن کوکنار ایکیش گه مجبور بولگن لر. رنجبرجنابلری محلی وخلق ارا مافیا سرپل ولایتی ده کورکنار ایکیلیشی گه دخلدارایکنی نی اورغولب و شونی اوچون بو ولایت ده مخدره ماده لرگه قرشی کورش اوته قیینت و مرکب ایش دیردیب تاکیدلشدی.

سرپل ولایتی دهقانچلیک اداره سی ریسی بو باره ده دیدی:« بیزگه یتیب کیلگن معلومات لرگه اساساٌ جاری ییل ده مخدره ماده لرمافیاسی حتی کوکنارنی اصلاح بولگن اوروغینی دهقان لرگه اختیاریگه قویشکن و بو تخم لر هر موسوم ده اوچ وحتی تورت بار حاصل بیره دی حالانکه اوتمیش ده فقط بیر بار محصول قولگه کیلردی.

سرپل ولایتی نینگ بیرقطار کوکنار ایکنزارلرینی یقین دن کوزتکن و بو حقده محلی وامنتی مسوللرِ و خصوصا زراعت و مخدره ماده لرگه قرشی کورش اداره لری باشلیغ لری بیلن توغریدن توغری صحبت لشکن نشانه خبرنگاری، سرپل ولایتی ده کوکنار ایکیلگن اینکزارلرنی انیق مساحتی قنچه ایکنی دن معلوم رقم گه قول تاپه آلمگن.مسول اداره لرگه کوره ایچکی ایش لروزیرلیگی ، مخدره ماده لرگه قرشی کورش وزیرلیگی بیلن بیرگه بولگنی سبب ولایت لرده مخدره ماده لرگه قرشی کورش اداره لر امنیه قوماندان لیک لر دایره سیده بیر مدیریت گه تنزیل تاپکن و شو جهت دن بو اداره کوکنار ایکیلگن ییرلرمیزانی نی رویخط ده آلیش گه موفق بولمگن لردیب ایتکن.

افغانستان جهان بویلب اینگ کوپ مخدره ماده ایشلب چیقاره یاتکان مملکت دیر.امریکا نی مخصوص تیکشیروچی اداره سی « سیگار» تمانیدن ۲۰۱۹ میلادی ییل ده نشرایتیلگن راپورگه کوره افغانستان، جهان بویلب مخدره ماده ایشلب چیقاره یاتکان مملکت لر رویخطی ده هلی هم بیرینچی اورین نی ایگللب تورگنی قید ایتلگن.