بادغيس ولايت كينگاشي اعضالريني ايتيشيچه طالبان جنگچي لري بو ولايت نينگ ايككي عيال پوليسي ني آتيب اولديرگن.

بادغيس ولايت كينگاشي رييسي عبدالعزيزبيك نشانه خبر آژانسي بيلن صحبت ده، بو ايككي پوليس اوتكن شام ( دوشنبه ٢٦ عقرب) قلعه نو شهريگه تيگيشلي بولگن لامان منطقه سيده و هرات – قلعه نو شاه يولي حدوديده طالبان جنگچي لري تمانيدن تيرباران بولگن ديب ايتي. بيك جنابلريگه كوره بو محل طالبان نظارتي آستيده دير.

بيك جنابلري بو ايككي عيال پوليس بادغيس ولايتي امنيه قوماندان ليگي جنايي بوليمي ملازم لري بولگن و هرات ده نيچه كونليك تعطيل لريني اوتكزيل ايش محل لريگه قيتماقخي ايكن. بو ايككي پوليس جسدلري بادغيس مركزي شفاخانه سيده انتقال بيريلگن.

اما بادغيس امنيه قوماندان ليگي نشانه خبر آژانسي به تكرار تماس لريگه جواب بيرمدي. باشقه تماندن بادغيس ولايتي عياللر ايشلري اداره سي ريسي راحله نادري بو واقعه يوز بيرگني ني تصديقلب اما حاضرگه قدر واقعه تفصيلاتي بو اداره گه يتيب كيلمگن ديدي.

محلي منبع لر هم بو ايككي عيال پوليس كيلين و قيينه بولگني و تعطيل كونلريني هرات ده اوتكزيش اوچون بارگن ايديلر ديب اوتكن كوني قيتيش چاغيده اولديريلگن ديب ايتكن.

هرات- بادغيس شاه يولي  طالبان تمانيدن چك پايينت ايجاد ايتيلگني سبب ناتينچ دير و حربي ملازم لر و دولت ايشچي لري اوچون خوفلي دير. طالبان بوندن آلدين هم بو شاه يولده يولوچيلرني موترلردن توشيريب تيرباران قيلگن.