ايچكي ايشلر وزيرليگي، غزني ولايتي ده عامه محافظت كندكي گه اويشتيريلگن موتربمب نتيجه سيده ٧ كيشي اولديريليب و ١٦ كيشي ياره لنگني تصديق لشدي.

ايچكي ايشلر وزيرليگي سوزچي سي طارق آرين گه كوره اوتكن كيچه ( شنبه ١٨ اسد) غزني ولايتي ده عامه محافظت كندكي قرارگاهي گه قرشي موتربمب هجومي اويشتيريلدي و اوني نتيجه سيده اوچ عسكر و عامه محافظت كندكي ني تورت قوريقچي سي اولديريلدي و عامه محافظت قوتلري قوريقچي لري داخل ١٦ كيشي جراحتلندي.

بو موتربمب اوتكن كيچه ساعت ٧ و ٤٥ دقيقه ده غزني شهريني ” كوتل روضه ” ساحه سيده پارتلگن. قوراللنگن هجومچي لر موتر بمب پارتلگني دن سونگ عامه محافظت قرارگاهي گه كيرماقچي بولگن اما امنيتي قوتلر مقاومتي گه دوچ كيلگن. ايچكي ايشلر وزيرليگي امنيتي قوتلر مقاومتي سبب نيچه قوراللي هجومچي اولديريلگني تي انيقلنتيرمگن.

مملكت جنوبيده جايلشكن غزني ولايتي نينگ بير قطار حدودلريده طالبان قوراللي فعاليت قيلماقده.