غني: تروريسم ني بيشينچي تولقيني افغانستان ني تهديد ايته دي
neshananews
28 September 2020افغانستان جمهور ريسي محمد اشرف غني بيرقطار خبرنگارلر بيلن اوچرشكنده حاضرچه ليك تروريسم ني بيشينچي تولقيني افغانستان ني تهديد ايتماقده ديب ايتكن.
جمهور ريسليك سراي اوتكن شام( دوشنبه ٦ ميزان) بير خبرنامه نشر ايتيب غني جنابلري بو موضوع ني دوحه دن قيتيب كيلگن خبرنگارلر بيلن اوچرشكنده بيان ايتكني ني يازگن. خبرنامه غني جنابلريدن نقل قيليب علاوه ايتكن حاضرچه ليك كرونا و اقليم اوزگريشلريدن علاوه افغانستان و منطقه ني باشقه بير قطار مملكت لريني تروريسم بيشينچي تولقيني تهديد ايتماقده.غني جنابلري بو تهديد آلديني آلنيشي اوچون منطقه اي همكارليك گه ضرورت بار ديب تاكيدلشكن.
هرچند جمهور ريس غني تروريسم بيشينچي تولقيني نمه بولگني حقيده تفصيلات بيرمگن اما بير قطار امنيتي متخصص لرگه كوره داعش گروهي نينگ خراسان قناتي افغانستان تينچليك و خوفسيزليگي قرشي سيده ييريك خطرديب بهالشكنلر.
جمهور ريس بو اچرشوده شونينگ ديك قطر ده دوام ايته ياتكان صلح مذاكره لريگه توختليب طالبان بيلسين لر كه يالغيز بير گروه بيلن يوز مه يوز ايمسلر بلكه صلح آقيميده افغانستان جماعه سي يوز مه يوز ديرلر ديب تاكيدلشكن.
غني جنابلري افغانستان ده طالبان جنگچي لريني خطرلي بهالب حاضرچه جهان جماعه سي طالبان مملكت ده يرتكن خطرلرني توشينگن ديدي. اونگه كوره مملكت اساسي قانوني بيرينچي و ايككينچي فصل لريده قيد ايتيلگن افغانستان يشوچيلري اساسي حقلري و مملك نينگ اوتكن ١٩ ييل جريانيده حاصل بولگن يوتوقلري هيچقچان صلح مذاكره لر آقيميده قربان بولميدي ديب اورغولشكن.
عيني حالده افغانستان دولتي و طالبان گروهي هياتلري حاضرچه تينچليك مذاكره لرايش طريقه سيني يكونلنتيريش ده اورين ماقده لر. بو ايش طريقه سي اساسيده ايككي تمان مملكت ده اوروش ني بير سياسي كيليشو دايره سيده يكونلنتيريب و طالبان گروهي ايسه قدرت گه شريك بولماقچي.
