غني و خليل زاد قطر ده اوچرشديلر
neshananews
06 October 2020افغانستان جمهور رييسي محمد اشرف غني قطرگه قيلگن سفري جريانيده امريكا ني افغانستان بويچه مخصوص نماينده سي زلمي خليل زاد بيلن اوچرشكن.
جمهورريس ليك سراي بير خبرنامه نشر ايتيب يازگن بو اوچرشو اوتكن شام( دوشنبه ١٤ ميزان) قطر پايتختي دوحه شهريده بوليب اوتكن. بو اوچرشوده ايككي تمان افغانستان ده تيزليك ده آتش كيسيم برقرار ايتيليشي ده تاكيدلشديلر. خبرنامه گه كوره مملكت ده سونگي ناقرارليك لر امريكا و افغانستان دولتي اوچون قبول قيلينرلي ايمس.
غني جنابلري بو اوچرشوده قطر ده افغانستان دولتي و طالبان گروهي ارا مذاكره لر باشلنيشي بيلن عيني دمده توقنشولر كوپيگني ني اورته گه قويب صلح مذاكره لري موفقيتي اوچون بو زوروانليك لر كميشي لازم ديب ايتي.
ارگ خبرنامه سيگه كوره امريكا ني افغانستان تينچليگي بويچه مخصوص نماينده سي زلمي خليل زاد هم بو اوچرشوده افغانستان تينچليك آقيمي افغانستان مردمي مالكيت و رهبرليگي بيلن آلغه سوريليشي لازم ديدي.
افغانستان دولتي و طالبان گروهي ارا مذاكره لر ايش طريقه سي بويچه ايككي تمان ارا كيليشو مدتي چوزيلگني دن سونگ جمهوررييس اشرف غني و زلمي خليل زاد قطرگه سفر قيلديلر.
قطرده بولرنينگ حضوري بيلن جاري مذاكره لر ايشي آلغه سوريليشي كوتيليب و ايككي تمان هياتلري ارا دستلبكي كليشو حاصل بوليشي ممكن.
افغانستان دولتي و طالبان ارا مذاكره لر ٢٣ كون آلدين ( ٢٢ سنبله ) قطرده باشلنگني.
