بوكونلر فارياب اسمي كوپراق اوروش بيلن توگيلگن و هر بار بو ولايت تومنلريدن بيري نينگ آتي توتيلگنده، تيگلوچي بير اچنرلي و اچيغ حادثه خبري ني تينگلشي ني كوته دي.

اما بو گل سوز اوروش و اچنرلي حادثه دن ايمس، بلكه بير عيال باشقريه ياتكان بير تومن حكايه سي دير.خان چهارباغ فارياب ولايتي نينگ تينچ تومنلريدن بيري دير كه قيته قوريش ايشلر اونده شدت بيلن دوام ايتيب بارماقده.

بو تومن نينگ اسمي بوكونلر، مملكت تاريخي ده ايككنچي تومن حاكمي بولگن خانم درتاج خالقي بيلن بيرگه توتيلماقده. خان چهارباغ اندخوي تومني نينگ شماليده جايلشكن و فارياب مركزي ميمنه شهريدن قريب ايككي يوز كيلومتر مسافه سي بار.

هرچند حاضرچه فارياب ولايتي نينگ اكثرتومنلريده هركوني ( المار، قيصار، گرديوان، بلچراغ، كوهستان، قرغان، شرين تگاب، دولت آباد و خواجه سبزپوش) اوروشلر دوام ايتماقده، اما خانم درتاج تمانيدن باشقريله ياتكان خان حهارباغ تومنيده خوفسيزليك و توله امنيت حاكم دير.

خانم خالقي اوچ ييل آلدين افغانستان نينگ ايككنچي تومن حاكمي اوله راق فارياب ولايتي نينگ اوزاق توشكن بو تومنيده ايش باشله دي. بو تومنده اسفالت بولگن يوللر و حاكم ليك اوچون هيچقنداي بنا يوق ايدي. تومن يشوچيلريگه كوره بو عيال حاكم، اوز وظيفه سيني بير جهار ديوارليك دن باشله دي و حاضر اوچ ييل اوتيشي بيلن تومن ده توله امنيت تامين لنيشي دن تشقري، خان چهارباغ ده بجريلگن قيته قوريش و ينگي قورليش لر سبب، تومن سيماسي كوزگه كورنرلي درجه ده اوزگرگن.

درتاج خالقي خانم نشانه خبر آژانسي بيلن مخصوص صحبت ده ديدي: « خان چهارباغ تومن حاكم ليگي اوچون بير جدي رقابت ده قتنشديم و بخت گه موافق سينوده غلبه قازانديم، حاضر بو اوزاق توشكن اولسوال ليكده اولكه ام گه خذمت قيلماقده من.»

خانم خالقي دولت نينگ هيچ بير وظيفه سي ايركك لر يا عياللرگه اجرتيلمگن؛ بلكه هربير شخص كوچ و قابليت لريگه اساسا” دولت نينگ تورلي منصب لريده وظيفه بجريب و اولكه سيگه خذمت كورسته آله دي ديدي.

او افغانستان ده بير عيال، حاكم بوليش شرطي ني بيرينچي دن تعليم و ايككنچي دن اوزيگه ايشانيش گه بيله دي.

خالقي خانم سوزلريني دوام ايتيريب مين ايككي ساحه ده ( اداره و ديپلماسي و تجارت و اقتصاد) ايككي ته ليسانس آلگن من ديدي.

بو حاكم اوچ اوغيل باله و بير قيز آنه سي دير. درتاج خالقي خانم باشقره ياتكان حدود ده سفر ميز تشويش سيز اوتي. او فقط بير زره موتر و ايككي قوريقچي سي بيلن ايش محلي دن چيقيب ملي پوليس نينگ بير پوسته سيگه باريب و تومن خوفسيزليگي ني تامينلشده عسكرلر جسارتي دن تقديرلب قيتيش ده اسفالت بولگن يول دن و قوريليش ايشي دوام ايته ياتكان مملكت نينگ اينگ كتته اقتصادي پروژه سي يعني ” تيمير يول” خطي ايشي ني يقين دن كوزتدي.

خانم درتاج خالقي ديدي تركمنستان دن مملكت شماليده برق يتكزيش پروژه سي پايه لري خان چهارباغ حدودي دن معماسيز اوتيب يكونلندي و حاضر ايسه مملكت نينگ اينگ كتته كان اقتصادي پروژه سي يعني ٣٠ كيلومتردن عبارت بولگن تيميريول نينگ بيرينچي باسقيچي ايشي بجريلماقده.

اونگه كوره بيرمنطقه ده امنيت ني تامين لش اوچون مردم و اهالي نينگ همكارليگي اينگ مهم عامل دير، اگر مردم دولت نينگ قوراللي مخالف لريني يشه ياتكان منطقه لريده فعاليت قيليش ده رخصت بيرمسه لر، عصيانچي لر هرگز منطقه خوفسيزليگي گه خلل يتكزه آلميديلر.

خان چهارباغ حاكمي بو تومن ده اقتصاد و امنيت بويچه ايشله گندن علاوه عياللر اوچون هم يخشي ايشلرني بجرگن. درتاج خالقي خان چهارباغ ده وظيفه بجره ياتكان يگانه عيال ايمس، باشقه بير عيال هم علاقه واسطه لر( مخابرات ) اداره سي باشليغي اوله راق ايشلشه دي. خان چهارباغ تومن حاكمي نشانه خبر آژانسي بيلن صحبت ده، او بو تومن ده عياللر ترماقي ني ايجاد ايتكني و يقين كيله جكده بير عيال ني قريه دار اوله راق تعين لشي دن هم سوز يورتدي.

او عيني دمده بو تومن نينگ خوفسيزليك و امنيتي توله تامين لنگني سبب، محلي اداره بير ييش شهرچه ني فايده لنيش گه تاپشيريشي دن بشارت بيريب يقين كيله جكده بو شهرچه برچه كيرك بولگن امكانيت لر بيلن جهازلنيب مردم كه ببريله دي ديدي ، او امنيت بولمگنده بو ايش هيچ قچان ثمره بيرمس ايدي ديدي. بونگه قوشيمچه، تومن حاكميتي بناسي نينگ قوريليشي، خان چهارباغ سركلرب اسفالت بولگني، برق پايه لر اوتكزيليشي،آقينه تجارتي شهرچه سي قوريليشي، خارجي مهمانلر اوچون دولتي مهمانخانه لر قوريلگني و تيمير يول خطي بو تومن دن اوتيشي بو عيال حاكم نينگ دقت گه سزاوار يوتوقلري جمله سيدن دير.

آقينه بندري خانم درتاج حاكميت قيله ياتكان حدود ده جايلشكن. فارياب ولايتي تيمير يول اداره سي ريسي انجنير عبدالملك، بو تيمير يول خطي ، حاكمي بير عيال بولگن تومن حدوديدن اوتيشي دن خرسند مين ديدي.

اوني معلوم قيليشيچه خان چهار باغ تومن حاكمي بو اداره و اهالي اورته سيده تاپيلگن معمالرني حل ايتيش ده يخشي حكم و صادق مسول ايدي.

محلي ارگانلر اداره سي مسوللري مملكت نينگ ١٨٨ تومنيده حاضرگه قدر فقط اوچ عيال حاكم اوله راق وظيفه بجرگني ني تصديقلشكن.حاضر ايشي دن چيتلشتيريلگن جوزجان ولايتي خواجه دوكوه تومن حاكمي سايره شكيب، فارياب ولايتي خان چهارباغ تومن حاكمي درتاج ايماق خالقي و بلخ ولايتي چهاركنت تومن حاكمي سليمه مزاري بو اوچ حاكم عياللر دير.

بو سفر يكونيده خان چهارباغ تومن حاكمي دولت نينگ قوراللي مخالف لريدن، مملكت، يوللر، مكتبلر، مدرسه لر و عامه بنالرني ويران ايتيش دن قول تارتيش لريني طلب ايتيب مملكت اهالي سي حيات حق لريدن يخشي روشده فايده لنيش گه مردم گه اجازت بيرسينلر ديدي.

او شونينگ ديك صلح مذاكره لري مثبي نتيجه بيريشي ني اميد قيليب طالبان دولت صفيگه قوشيلكن دن سونگ عياللر ايشلشي گه قرشي ليك كورستمس ليك لريني آرزو قيلدي. او ، افغانستان عياللري ايندي ليك ده اوز حق حقوقلريدن حمايه ايتيب و ايركك لر بيلن يان مه يان مملكت آبادان ليگي و قيته قوريشي ده حصه قوشه آله ديلر ديب تاكيد لشدي.