قشاق و وروش يورتيده كرونا ويروسي قيته ييرلگني
neshananews
22 November 2020كابل و مملكت نينگ باشقه بير قطار شهرلريده دهشتلي و استخباراتي اوروش اوج آلگن پيتده، كرونا ويروسي ينه بيربار افغانستان فلاكتلي اولكه سي و بو آفت گه قرشي كورش ده ساغليك ني سقلش امكانيت و كيركلي بودجه گه ايگه بولمگن يشوچيلري حياتي ني جدي خطر بيلن يوزمه يوز قيلگن.كرونا ويروسي قيش موسوميده كوپراق ييرليشي كوتيلماقده و مينگ لب كيشي حياتي ني تهديد قيليشي ممكن.
مملكت ده گي قشلاقدليك شبهه سيز اوروش و زوروانليك تاثيري دير و باشقه تماندن كرونا ويروسي قيته ييرلشي هم مملكت اهالي سي حياتي ني تهديد قيليشي جدي دير.
جهان آذوقه تشكيلاتي معلوماتلريگه كوره كرونا ويروسي سبب قشاقليك و كمبغل ليك جهان بويچه مثل سيز درجه كوپيب بارماقده و آسيا قطعه سي باشقه قطعه لردن كوره جدي صدمه بيلن يوز بوليشي ممكن. افغانستان ده هم اوروش و زوروانليك دوام ايتيب باريشي سبب بو صدمه و قيينتچيليك لردن امان قالمسليگي ممكن.
شو حاضر جهان نينگ اكثر مملكتلريده كرونا ويروسي ييرليشي سبب قرنطينه قيته باشلنگن. افغانستان دولتي هرچند عالي اوقويورتلرني كرونا ويروسي ييرليشي و خودكش و پارتلش و راكت هجوملر سبب تعطيل قيلگن اما افغانستان ده تعطيل ليك و قرنطينه قانعقرلي جواب بيرمگن و باشقه تماندن ميليونلي آچ انسانلرني قرنطينه گه سقلش ناممكن ايش دير. بونگه بناعن مملكت ني سياسي، طبي و حربي پاليسي سازلري بو آفت و قشاقليك گه قرشي كورش اوچون ينگي يول يوروق لرني نظرده آليش لري كيرك.
عامه ساغليك وزيرليگي معلوماتيگه كوره اوتكن نيچه هفته جريانيده كرونا ويروسي ني يوقتيرگن كيشي لر ساني مملكت ده آزتيب بارماقده و اينگ تازه خبرلرگه كوره اوتكن بيركيچه كندوزده ١٢ كيشي بو ويروس سبب اوز جاني ني قولدن بيرگن.عامه ساغليك وزيرليگي ده منتظم سيستم و رقملردن انيق معلومات يوق ليگي سبب اعلان بولگن رقملر موز تاغي گه اوخشيدي كه فقط اوني چوقي سي كورنيب تورگن.
بو قيش موسوميده هوا ساووغليگي و قار ياغيشي گه قرگنده شهرلرده ده گروهي هجوملر كميگن اما خودكش و راكت هجوملري و ريجه لنگن ترورلر كوپيشي ممكن. باشقه تماندن كمبغل ليك بير جدي معما اوله راق افغانستان اهالي سيگه آغير توشيشي ممكن. ايندي ليك ده افغانستان خلقي حياتي اوچ دشمن يعني اوروش اوتي، قشاقليك و كرونا تهديد قيلماقده و بولرگه قرشي كورشده مقابله قيليش گه هم كوچسيز ديرلر.
بو وضعيت دن چيقيش اوچون مملكت نينك برچه يشوچيلري ني قاطعيت وجديتي لازم دير. دولت، بيرتماندن اهالي، دين عالملري و اخبارت واسطه لر همكارليگي بولمگنده
و باشقه تماندن جهان جماعه سي حمايتي سيز جاري وضعيت گه غالب چيق آلميدي.
تاريخ دواميده افغانستان خلقي اوتكن اوچ ييل كبي بونچه ليك قيينتچليك، قشلاقليك و آفت بيلن بوز مه يوز بولمگنديلر.احتمال بو اوتكن اوچ ييل مملكت عادي يشوچيلري اوچون ” اينگ قرانگي” ييللر بولگن و بو مدت ده هيچ بير خوش كون ني كورمي خرسندليك گه يشمكن بولسه لر. كرونا ويروسي يرليشي و اوروش شدت آليشي بو آره همه دن كوره دهشتلي تاثير قالديريگني همه گه معلوم.
صلح مذاكره لريدن تشويش، زوروانليكلرني شدت آلگني، كمبغليك سي درجه كوتاريلگني جدي، تهديدلر اوله راق كيله سي قيش موسومي ني بو مملكت اهالي سي اوچون تشويشلنرلي قيش گه ايلنتيريشي ممكن.
بو وضعيت دن اوتيش دولت نينگ جدي، معقول و هرتمان له مه سياستي، جهان جماعه سي ياردملري، اهالي همكارليگي، كابل ده ملي اجماع و نهايت ده صلح مذاكره لري مثبي نتيجه گه ايرشيشي گه باغليق دير.
