قندهار ولايتي محلي رسميلري، قندهار شهري نينگ اونبيرينچي ناحيه سيده پارتلوچي ماده ده توله بير موتر پارلشي نتيجه سيده ملي پوليس نينگ آلتي ملازمي ياره لنگني ني تصديقلشكن.

قندهار ولايت حاكمي سوزچيسي احمد بهير احمدي نشانه خبر آژانسي بيلن صحبت ده بو واقعه بوكون (چهارشنبه ٥ قوس)توش دن آلدين ساعت ١٠:٤٠ ” عينو مينه شهرچه ” سيده يوزبيرگن ديدي.

احمدي جنابلري مازدا توريدن و پارتلوچي ماده دن توله بولگن بير موتر اونبيرينچي پوليس حوزه سي قراولي مقابليده پارتلتيلگن و اونگه كوره بو واقعه ده اينگ آز آلتي پوليس ياره لنگن.

بو پارتلش اهالي يشه ياتكان بير محل ده  يوز بيرگني سبب اهالي گه كوپلب خساره يتكزگن اما حاضرگه قدر خساره ميزاني انيقلنمگن.

حاضرگه قدر بو پارتلش مسووليتي ني هيچ كيم يا گروه اوز ضممه سيگه آلمگن. اما امنيتي ارگانلر طالبان گروهي ني بو موتر بمب پارتلشي مسوولي ديب تانيشتريگن.

اوتكن ايككي كون جريانيده كابل و باميان ولايت لريده يوزبيرگن تورت پارتلش ده عادي اهالي دن اينگ آز  ايگرمه كيشي قربان بوليب و ٦٠ كيشي هم تن جراحت كورگن.