افعانستان عامه ساغلیک وزیرلیگی سرپرستی وحید‌مجروح، قوشنی اوزبیکستان، تاجیکستان و ایران هرکونی یوزلب آکسیجن‌بالون‌لرینی افعانستان عامه‌ساغلیک وزیرلیگی اختیاریگه قویشی دن سوزبیرگنلر دیب ایتی‌

عامه‌ساغلیک وزیرلیگی سرپرستی بوکون ( یکشنبه ۲۳ جوزا) کابل‌ده بیر خبری یغینده، ایککی هفته‌دن‌بیری کروناویروسی بیمارلرینی دواله‌یاتکان کسلخانه‌لرده آکسیجن کمچیلیگی‌ني برطرف ایتیش اوچون جدي چاره‌تدبیر آلیگنی‌ني تاکیدلشکن.

مجروح‌جنابلری، دولتی شفاخانه‌لر خصوصن کروناویروسینی دواله‌یاتکان کسلخانه‌لرده آکسیجن ایشلب‌چیقاروچی دستگاه‌لر فعال بولگن و هرکونی خصوصی شفاخانه‌لر تمانیدن بو وزیرلیگی‌گه بیریله‌یاتکان ۳۰۰ بالون آکسیجن‌دن علاوه کابل‌ده آکسیجن کمچیلیگی بیر‌حدگه‌چه برطرف ایتیله‌دی ديدي.

بونگه علاوه مجروح‌جنابلری قوشنی اوزبیکستان و تاجیکستان مملکتلری هرکونی ۶۰۰ آکسیجن بالونی افعانستان‌گه یتکزیشی و ایران‌هم هر هفته ایککی تانکر سویغ اکسیجن ني مملکت شمال و غربیده عامه‌ساغلیک وزیرلیگی اختیاریگه قویشلریدن ایشانچ‌بیلدیرگن‌.

 بونگه قوشیمچه مجروح‌جنابلریگه کوره ۴ مینگ ۵۰۰ آکسیجن بالونی هم ایران دن ساتیب آلینگن و یقین کیله‌جکده مملکت‌گه انتقال بیریلماقچی.

عامه‌ساغلیک وزیرلیگی سرپرستی سونگی هفته‌لرده مملکت ده آکسیجن کمچیلیگی گه توختلیب ديدي یونیسف اداره‌سی‌هم اون‌بیش ولایت‌‌نینگ دولتی کسلخانه‌لرنی آکسیجن ایشلب چیقاروچی اسکونه‌لربیلن جهازلنتیریشی‌‌دن سوزبیرگن اما بو تشکیلات بو ساحه آهسته‌سکین عمل قیلماقده.

عینی‌حالده اوتکن‌کونی خلق‌ارا عفو‌تشکیلاتی افعانستان حکومتی‌دن کرونا بیمارلیگی‌ني دوالش‌گه اجرتیلگن کسلخانه‌لرده ییترلیچه آکسیجن مهیا ایته‌آلمگنی دن تنقیدلب و کروناویروسی اوچینچی تولقینی ییرلیشی آلدینی آليش اوچون جدي چاره تدبیر کوریشینی طلب ایتکندی.