ملي يرش عالي كينگاشي ني اعلان قيليشيچه ايران ليك مقام لر بو كينگاش ريسي عبدالله جنابلري بيلن اوچرشوده، افغانستان تينچليك تامين لنيشي اوچون برچه سعي و حركتلردن حمايت ايتيشي دن خبر بيرگن.

ملي يرش عالي كينگاشي اوتكن شام( يكشنبه ٢٧ ميزان) بير خبرنامه نشر ايتيب، بو كينگاش ريسي عبدالله عبدالله ايران تشقي ايشلر وزيري جواد ظريف و پارلمان باشليغي محمدباقر قاليباف بيلن اوچرشكن.

بو اوچرشوده ايران تشقي ايشلر وزيري، مملكتي افغانستان ده تينچليك تامين لنيشي بويچه برچه سعي و حركتلردن حمايت ايتيشي دن سوز يورتكن. خبرنامه گه كوره، ايران تشقي ايشلر وزيري، افغانستان تينچليك و برقرارليك تامين لنيشي ايران منفعتي گه بولگني ني تاكيدلب و بو مملكت منطقه برقرارليگي ده سبب بوله ياتكان برچه سعي و حركت دن ارقه داشليك قيليشي ني تاكيدلشكن.

عيني دمده ايران پارلمان رييسي محمدباقر قاليباف ملي يرش عالي كينگاشي بيلن علاحيده اوچرشكنده، ايران پارلماني هم افغانستان تينچليگي بويچه سعي و حرمتلردن حمايت ايتيشي ني ايتكن.

ملي يرش عالي كينگاشي مطبوعات دفتري معلوماتيگه كوره قاليباف جنابلري تاكيدلشكن افغانستان ده دايمي صلح و برقرارليك ده سبب بوله ياتكان هربير سعي و حركت ايران منفعتي گه بولگن و ايران اوندن حمايت ايته دي.

افغانستان ملي يرش عالي كينگاشي ريسي عبدالله عبدالله ايران دولتي رسمي دعوتيگه كوره اوتكن كوني ايران گه سفر قيلدي. او افغانستان تينچليكي اوچون منطقه اي اجماع ني قوللب قوتلش ني اوز سفري مقصدي اعلان ايتكن. عبدالله جنابلري بوندن آلدين هند و پاكستان گه هم اشبو مقصد بيلن سفر قيلگندي.