منبع‌لر: محمد‌داوود‌لغمانی غزنی ولایت حاکمی تعینلنگن
neshananews
29 May 2021حکومت گه تیگیشلی منبع‌لر، فاریاب سابق حاکمی محمد‌داوود‌لغمانی، غزنی ولایت حاکمی تعینلنگنی ني تصدیقلشکن.
اوز اسمینی ایتیش نی ایسته مگن بیر حکومتی منبع، لغمانی جنابلری بوکون( شنبه۸جوزا ) غزنی ولایت حاکمی تعینلنگن دیب ایتکن. بو منبع گه کوره لغمانی جنابلری یقین کیله جکده غزنی ولایت حاکمی اوله‌راق اوز وظیفه سيني رسمی روشده باشله ماقچی.
محمد‌داوود لغمانی بوندن آلدین فاریاب ولایت حاکمی تعینلنگندی
اما فاریاب ولایتی مینگلب یشوچیلری اوني بو ولایتده حاکم تعینلنیشی گه قرشیلیک کورستیلر.اعتراض‌چیلر ولایت ایشیگی ني یاپیب ولایت بناسیده کیریش اوچون اونگه رخصت بیرمدیلر.
فاریاب ولایتی یشوچیلری اعتراضلری دوام ایتیشی سبب،حکومت لغمانی‌جنابلرینی پایتخت کابل گه چقیریش گه مجبور بولیب فاریاب ولایتی حاکمی اورین‌باسرینی ولایت حاکملیگی سرپرستی تعینلشدی.
ملي بیرلیک حکومتی ايجاد ايتيليشي دن حاضرگه قدر بو ایککیچی بار دیرکه حکومت تعینلشکن حاکمی ني ولایت چوکی سیده اولتیرغیزه‌آلمگن. ملي بیرلیک حکومتی اورته لریده انجنیر داوود داوود بلخ ولایت حاکمی تعینلندی.اما عطامحمدنور مخالفتی دن سونگ او اوزایشینی حاکم اوله‌راق باشلی‌آلمدی.
