ناتو تشكيلاتي ني افغانستان ده گي ايلچيسي، جاري تينچليك آقيميده افغانستان عياللري حقي سقلنيب و ناتو تشكيلاتي بو آقيمده عياللرني معنالي رولي دن حمايت ايته دي ديب ايتكن.
ناتوني افغانستان ده گي ايلچيسي استيفانو پونته كورو بوكون ( شنبه ١٠ عقرب) عياللر، تينچليك و خوفسيزليك بويچه بيرلشكن ملتلر تشكيلاتي خوف سيزليك كينگاشي “١٣٢٥” قراري صادر ايتيليشي ايگرمه ييل ليگي مناسبتي بيلن بير ويديويي پيام نشر ايتيب تينچليك آقيميده عياللر حقلري سقلنيشي ضرورتي ني تاكيدلشكن.
كورو جنابلري تينچليك آقيميده عياللر حقلري سقلنمس ليك بيلن افغانستان ده دايمي برقرارليك تامين لنمي دي ديدي. اونگه كوره افغانستان عياللر حقلري بو آقيميده توله رعايه ايتيليب سقلنيشي لازم دير.
ناتوني ملكي ايلچيسي تورلي ساحه لر عياللر حضوريني خصوصا تعليم، ساغليك ني سقلش، سپورت و حكومتدارليك ساحه لريگه توختليب افغانستان عياللري اوتكن ايگرمه ييل ده كوزگه كورنرلي يوتوقلرگه قول تاپكنلر ديگن. او افغانستان حكومتي و اهالي سي بو يوتوقلرني رواجلنيشي ده ياردم بيريش لري لازم ديب ايتكن.
افغانستان دولتي و طالبان گروهي ارا تينچليك مذاكره لر باشلنگني بيلن عيني حالده عياللر حق حقوقلري و ايركين ليكلريدقربان بوليشي دن خواتير و تشويش لر شدت آلگن.