ناتو تشکیلاتی نی افغانستان ده گی نماینده سی، بو تشکیلات افغانستان ده سوز ایرکین لیگی، عیاللر حقلری، قومی و مذهبی ازلیک لر حق لرینی سقله یاتکان دایمی تینچلیک کیلتیریش ده ضممه دارمیز دیب ایتکن.

ناتو تشکیلاتی افغانستان ده گی ملکی نماینده سی استیفانو پونته کورو، بوکون ( دوشنبه ۳۱ سنبله ) خلق ارا تینچلیک کونی مناسبتی بیلن بیرویدیویی پیام ده ایتکن بو تشکیلات افغانستان ده دایمی تینچلیک و برقرارلیک کیلتیریش ده ضممه دار دیر. کورو جنابلری افغانستان دولتی و طالبان گروهی ارا مذاکره لر باشلنگنی گه اشاره قیلیب ایتکن بو مملکت یشوچیلری بو آقیم دایره سیده دایمی تینچلیک اورنتیلیشی گه امیدلری کاتته دیر.

کورو جنابلرینی معلوم قلیشیچه ناتو اتقاقی افغانستان ده دایمی تینچلیک و آسایشته لیک تامین لنیشی گه تعهدی کاتته بولگنی و تینچلیک مذاکره لری آقیمی ده افغانستان ملتی غایه لری و اوتکن ایگرمه ییل لیک یوتوق لر جمله ده عیال لر و آزلیک لر حقی و سوزایرکین لیگی تامین لنیشی دن حمایت ایته دیب تاکیدلشکن.

ناتونی ملکی نماینده سی شونینگ دیک ناتو تشکیلاتی عینی دمده افغانستان  تینچلیک تامین لنگون گه قدر امنیتی قوتلری تعلیمات و جهازلنتیریشی ده اوز بورچی نی دوام ایتیره دی دیب ایتکن/

ناتو نینگ بو یوقاری مقامی افغانستان ده تینچلیک کیلتیریش ده بو اتفاق تعهدی نی اورته گه قویگن که دولت و طالبان ارا یوز مه یوز مذاکره لر قطر ده باشلنگن. ایککی تمان حاضرگه قدر تینچلیک مذاکره لر ایش طریقه سی اوستیده صحبت لری نی دوام ایتیرماقده لر.