بلخ ولايتي كوويد١٩ گه قرشي كورش كميسيوني قراريگه مطابق بو ولايت مركزي مزارشريف شهري اون كون مدتيده قرنطينه بولماقچي. بلخ ولايتي محلي رسميلريگه كوره قرنطينه جريانيده، اهالي باردي كيلدي سي و عمومي يغين لرده جدي چيكلولر جاري ايتيلگن.

كوويد١٩ گه قرشي كورش كميته ريسي ولايت حاكمي اوتكن كوني توش دن كين (شنبه١٠جوزا) بير قرار نشر ايتيب بلخ عامه ساغليك اداره سي راپورلريگه مطابق بو ولايت يشوچي لري هيت كونلريده قرنطينه اصوللريني رعايه ايتمگن لري سبب بلخ ده كرونا ويروسي نينگ مثبت واقعه لري كوپيماقده ديب اعلان ايتكن. بلخ ولايتي كوويد١٩ گه قرشي كورش كميسيوني قراريگه مطابق مزارشريف قرنطينه سي بوكون يكشنبه دن (يكشنبه١١جوزا) باشلنيب كيله سي اون كون گه قدر دوام ايته دي.

بو قرارده، قرنطينه كونلرده ييمليك اشيا ساتوچي دوكانلر، مندوي، داروخانه لر،كسلخانه لر، نان پزليك لر، ميوه و سبزوات ساتوچي لر و بانك لر فعال بوليب و قالگن صنف لر جمله دن كفايت ماركيت، عمده فروشليك لر ، ماركيت لر ، رستورانت لر، تعليمي مركزلر، پارك لر و سو حوضلري فعاليت قيليش ده حق لري يوق.

بو كميسيون قراريده شونينگ ديك شهر ايچكري سيده موترسايكل و ارابه لردن استفاده بوليشي منع ايتيلگن و تاكسي هيدوچي لري اوچ مسافردن كوپراق مينديريش گه حق لري يوق.بو قرارگه اساسا” نماز اوقوچي لر، نماز پيتيده شخصي جاي نماز دن استفاده قيليب و اجتماعي مسافه ني رعايه ايتيش لري شرط ديب تاكيدلنگن.

عيني حالده مزارشريف بيرقطار يشوچي و دوكاندارلري كوويد١٩ گه قرشي كورش كميسيوني بو قراريدن ناراضليك بيلديرگن لر. اولر ديديلر قرنطينه جريانيده دوكانلر كرايه سي معاف ايتيليب و يا دولت كرايه لريني تولشي لازم. كامپيوتر اسباب لريني ساتوچي دوكان ايگه سي بكتاش نشانه خبر آژانسي بيلن صحبت ده ديدي:”اهالي نينگ كتته توپلنيش مركزي مندوي دير، اما دولت هركوني نهايت ٥٠ مشتري سي بولگن جاي لرني تعطيل قيليش ده قرار آلگن.” شونينگ ديك مزارشريف يشوچي سي رحيم الله هم ديدي:” قرنطينه يالغيز روضه اطرافيده رعايه ايتيله دي اما مزارشريف نينگ باشقه ساحه لري مردم يوزيده آچيق دير و تجربه كورستكن كه قرنطينه اونچه ليك فايده لي ايمس.”

افغانستان عامه ساغليك وزيرليگي تمانيدن نشر ايتيلگن ينگي معلومات گه كوره بلخ ولايتي ده مثبت واقعه لر رقمي تازه ليك ده رويخط ده آلينگن٣٣ مثبت واقعه بيلن ١٠٠٩ واقعه گه كوپيگن.مزارشريف شهريده هيت دن بير هفته آلدين قرنطينه جاري بولگن ايدي و بو قرنطينه اوتكن كوني يكونلنيشي ريجه لنگن دي اما ينه اون كون اوزيتيريلدي.