بدخشان ده لاجورد انتقال و ساتيليشي توختتيلگني آرتيدن سوداگرلر ميليون لر افغاني ضرر قيلگن
سیمع‌الله سیحون
23 January 2020بدخشان ده لاجورد كانلري ناقانوني ايشلب چيقاريليشي آرتيدن بيش ييل آلدين افغانستان حكومتي بوتاش تجارتي ني ناقانوني اعلان ايتي و امنيتي ارگانلرگه بو قيمت بها تاش انتقالي و تجارتي آلدي آلينيشي بويروغ ني صادر ايتي.
لاجورد تاشي انتقال بيريليشي الدي آلينيشي دن سونگ بدخشان بازارلريده بو تاش نينگ كتته انبارلري و شونينگ ديك بو ولايت دن تشقريده هم بو تاش تجارتي منع ايتيليب و بدخشانليك سوداگرلر ، لاجورد انتقالي و تجارتي قيته باشلنيشي ني نيچه ييل دن بيري كوتماقده لر؛ اما حكومت حاضرگه قدر انبار بولگن لاجورد تاشلر تقديري حقيده هيچ بير قرار قول اوستيگه آلمگن.
بوندن قريب بير آي آلدين افغانستان جمهورريسي محمداشرف غني بدخشان ولايتي گه قيلگن سفريده بدخشان ليك سوداگر لرگه انبار بوليب قالگن تاشلر معماسي تيزليك برطرف ايتيليشي دن وعده بيردي.
بدخشان لاجورد سوداگرلري گه كوره لاجورد انتقال بيريليشي منع ايتيلگن دن بيري ميليون لر افغاني ضرر زبان كوريب حالانكه قيمت بها تاشلر طرزالعملي نافذ دير اما محلي حكومت بو تاش ني بدخشان دن تشقريده انتقال بيريش ده رخصت بيرميدي ديب ايتيشماقده لر.
بدخشان ليك سوداگرلرگه كوره افغانستان تجارت و صناعت وزيرليگي نينگ ينگي طرزالعملي گه اساسا سوداگرلر لاجورد تاشي ني مملكت ايچكريسيده گي بازارلرگه انتقال بيريشي گه حقدار ديرلر ، امااولرگه كوره بو طرزالعمل حاضر اجرايي خصوصيت گه ايگه ايمس.
بدخشان ولايتي قيمت بهاتاشلر اويشمه سي مسول لري، بو ولايت ده مينگ لرچه تن لاجورد تاشي انبارلرگه قالگن و سوداگرلر ميليون لرچه افغاني ضرر زيان كورگنلر ديب ايتماقده لر.
اون ييل دن بيري لاجورد تاشي تجارتي بويچه فعال بولگن سوداگر محمد ناصر ايتي:” برچه پول لري ميز ني لاجورد تاشي گه سرمايه ياتقيزگن ميز اما لاجورد تجارتي منع ايتيلگني دن سونگ ايككي مينگ سير دن كوپراق تاش انبار بوليب قالگن و كوپ خساره كورديك”.
اونگه كوره اگر حكومت انبار بولگن تاشلر ساتيليشي گه رخصت بيرمسه برچه ياتقيزگن سرمايه ميز نابود بوله دي.
بدخشان ولايتي قيمت بها تاشلر اويشمه سي مسول لري لاجورد تاشي تجارتي منع ايتيلگني دن سونگ اونلب كارخانه ايشي توختتلگني دن خبر بيرگن.
اولرگه كوره قيمت بها تاشلر بدخشان دن باشقه ولايت لرگه انتقال بيريله ياتگان ييل لر جريانيده اونلب كيشي بو تاشلرني يويش، پروسس و قيريش ساحه سيده ايشلشرديلر اما لاجورد تجارت و انتقالي منع بولگن دن سونگ كارخانه لر دروازه لري ياپيلدي و كوپ وطنداش لريميز ايش سيز بولديلر.
بدخشان ولايتي قيمت بها تاشلر اويشمه سي مسولي باشليغي هدايت الله حكيمي بيش ييل آلدين گه چه بيز بو ولايت يشوچي لريدن اونلب عيال و ايركك لرگه ايش زمينه سيني مساعد ايتيب تركيه، ايران و عرب اميرليگي مملكت لري بيلن اونلبچه شرطنامه لرگه قول قويب بوتاشلرني ساترديك ديب ايتي.
حكيمي جنابلريگه كوره اولرني فعاليت لري توختتيلمگن تقديرده بيز بو ولايت يشوچي لريدن بيش مينگ كيشي گه ايش زمينه سيني مساعد ايته آلرديك.
او ، جمهورريس بدخشان گه قيلگن سونگي سفريده انبار بوليب قالگن تاشلر ساتيليشي وعده سيني سوداگرلرگه بيردي و قيمت بها تاشلر تجارتي طرزالعملي اختيارميزگه دير ديب ايندي حكومت لاجورد سوداگرلريدن بو تاشني ساتيب آليشي دستوريني عملي قيليشي لازم، چون بو ايش بولگنده بير تماندن سوداگر لر بوندن كوپراق زيان و خساره كورميديلر و باشقه تماندن مردم گه ايش زمينه سي مساعد ايتيله دي ديدي.
باشقه تماندن بدخشان ولايتي اقتصاد اداره سي مسول لري،حكومت لاجورد ني پروسيس قيله ياتگان كارخانه لر فعال بوليشي اوچون هر آي ده ٥٠٠ كيلو لاجورد انتقال بيريشي گه رخصت بيردي اما بو مقدارآز بولگني اوچون كارخانه لر قيته فعال بولميدقالدي ديديلر.
بدخشان اقتصاد ريسي حسيب دقيق گه كوره حكومت تمانيدن لاجورد انتقالي و تجارتي منع ايتيلگني اونلبچه لاجورد سوداگرلريگه قيينتچليك يرتكن.
او، بو قرار سوداگرلرگه ييريك خساره يتكزگندن علاوه دولت ني لاجورد كان لريدن ٤٠ ميليون ليك عايداتي ني هم صفر قيلگن ديدي.
بيش ييل آلدين هر كيلو لاجورد تاشي ني قيمتي افغانستان بازارلريده بير مينگ افغاني دن اوچ يوز دالر گه چه ساتيلردي اما لاجورد ايشلب چيقاريليشي و انتقالي منع ايتيلگن دن سونگ بيركيلو اعلي درجه لي لاجورد بهاسي ايككي يوز دالرگه پس گه توشكن.
اقتصاد متخصص لريگه كوره حكومت و خصوصن كانلر و اقتصاد وزيرلري انبار بوليب قالگن لاجورد تاشلريني سوداگرلردن ساتيب اليب لاجورد ايشلب چيقاريليشي ني قانوني لشتيريش بيلن اينگ درآمدلي بولگن بير اقتصادي فعاليت ني قيته بو ولايت ده فعال لشتيره اله دي ديب فكربيلديرگن لر.بدخشان لاجورد سوداگرلري حكومت دن ينگي طرزالعمل و جمهورريس وعده لريگه اساسن لاجورد تاشي تجارتي آزاد بوليشي كيرك ايگي ني طلب ايتكن، بونداي بولگن تقديرده اولر لاجورد تاشي پروسيسي بويچه سرمايه ياتقيزيب و اهالي گه ايش زمينه سيني مساعد ايتيش ده ايجابي ايش قيليش لري ممكن.
بيش ييل آلدين جمهورريس بير فرمان آرقلي بدخشان ده لاجورد ني ناقانوني ايشلب چيقاريليشي ني منع ايتي و اوشه وقت دن بيري مملكت ايچكريسيده لاجورد انتقال بيريليشي توختتيلدي.
بدخشان لاجورد كان لري كنترولي ني بيش ييل آلدين طالبان بير هجوم دن سونگ قولگه آلديلر و اوشه زماندن بيري كانلر ناقانوني گروه لر تمانيدن ايشلب چيقاريلر ايدي. حكومت بدخشان كانلري عايداتي ميزاني صفر بولگني و اوني فايده سي محلي زوروان لر و تروريستي گروه جونته سيكه كيريشي ني انگلب لاجورد انتقالي و تحارتي ني بدخشان ده منع ايتيشگه قرار آلدي.
حاضرچه قيمت بها تشلرني پروسيس قيله ياتكان كارخانه لر ايشي بوتكل توختتيلگني دن علاوه بدخشان ليك سوداگرلرنينگ مينگلب تن لاجورد تاشلري مهر و لاك بوليب هيچ كيم اوني ساته آلميدي.
