٢٠١٩ ييل ده افغانستان ده ٤٠٠ ژورناليست ايشي ني قولدن بيرگن
neshananews
19 January 2020خبرنگارلر مصونيت كميته سي افغانستان ژورناليست لري وضعيتي حقيده ٢٠١٩ ميلدي ييلي راپوريني نشر ايتي. ١٤ صفحه دن عبارت بولگن بو راپورده ٢٠١٩ ييل ده اينگ آز ٤٠ اخبارات واسطه ني ايشيگي اقتصادي قيينتچليك لر سبب ياپيلگن و ٤٠٩ خبرنگار شو معما باعث ايشلريني قولدن بيرگن.
كابل و يتي زون مركزيده عيني زمانده نشر بولگن بو راپور رسانه لر اختياريگه قويلگن.
خبرنگارلرگه قرشي زوروانليك لر مسولي كيم؟
افغان خبرنگار لر مصونيت كميته سي مسولي نجيب شريفي كابل ده اوتكزيلگن مطبوعات انجمني ده بو كميته اوتكن ٢٠١٩ ييل ده ژورناليست لر و اخبارات واسطه فعال لريگه قرشي ١٠٥ زوروانليك ني رويخط ده الگني دن خبر بيردي.
شريفي جناب لري،بو زوروانليك لر قتل، آدم اوغيرلش، تهديد، جراحت و وقتينچه حبس دن عبارت دير ديب ايتي.
مصونيت كميته سي مسولي اوتكن ميلادي ييل ده بيش خبرنگار تورلي حادثه لرده اوز جانلربني ني قولدن بيرگني ني ايتيب اوتكن ٢٠١٨ ييل گه قرگنده ٧١ فايز كميشي ني كورسته دي ديدي. اونگه كوره ٢٠١٨ ييل ده ١٧ خبرنگار افغانستان ده اولديريلگن ايدي.
اونگه كوره اوتكن ييل لرگه خلاف،٢٠١٩ ييلده افغانستان حكومتي خبرنگارلرگه قرشي زوروانليك دن ٤٢ فايزي گه دخلدار بوليب بيرينچي اورين ني ايگللشكن و اوندن سونگ طالبان، زوروان لر، داعش و رسانه مسول لري سونگي اورين گه تورگن.
خبرنگارلرگه قرشي زوروانليك لر كميكني سببي
مصونيت كميته راپوريگه كوره ٢٠١٩ ييل ده خبرنكارلرگه قرشي اينگ كوپ زوروانليك (٣٠ واقعه) مملكت جنوبشرقي ده رويخط ده آلينكن يعني طالبان و داعش گروه لري كوپراق فعال بولگن حدودلرده.
جنوبشرقي ولايت لردن كين، جنوب، غرب، و شرقي ولايت لر سونگي درجه ده جاي آلگن.
مصونيت كميته سي مسولي ني ايتيشيچه خبرنگارلرگه قرشي اويشتيريلگن زوروانليك لردن ١٨ فايزي عيال خبرنگارلرگه تيكيشلي دير.
اما بو كميته، تبنچليك مذاكره لر قوللب قوتلنگني، داعش گروهي كوچسيز بولگني، ژورناليست لردن حمايه ايتوچي ارگانلر سعي و حركتي و خارجي خبرنگارلرني افغانستان حضوري كميگني، خبرنگارلرگه قرشي زوروانليك لر كميگني گه سبب بولگن ديب ايتكن.
هرچند ٢٠١٩ ييلي خبرنگارلر اوچون زوروانليك لر جهتي دن يخشي راق ييل ايدي اما هلي هم بو تشويش بار كه هوا ايسيشي و طالبان نينك بهاري عمليات لري باشلنيشي بيلن شبهه سيز خبرنگارلر هم اوروش كوپيشي دن تاثيرسيز قالميديلر.
افغان خبرنگارلرگه كوره هنوز هم مملكت ده ژورناليست لرگه قرشي تهديد، قتل، و زوروانليك تشويشلنرلي وضعيت ده دير و بو زوروانليك لر آلديني آليش ده حكومت ييترليچه دقت و اعتبار قرتمه سه بو خواتير و تشويش لر شبهه سيز كوپيشي ممكن.
