نشست‌های مشورتی مردمی میان نیروهای پولیس و شهروندان زیر نام «پولیس، مردم و مسجد» از سوی فرماندهی پولیس ولایت جوزجان در شهر شبرغان برگزار می‌شود. این نشست‌ها ماه یک‌بار در مسجد حوزه‌های امنیتی شهر شبرغان با اشتراک عالمان دین و کنش‌گران مدنی برگزار می‌شود.

سبحان‌الله علمیار، مسوول رسانه‌یی پولیس مردمی فرماندهی پولیس ولایت جوزجان امروز (دوشنبه، ۲۰ دلو) در صحبت با خبرگزاری نشانه می‌گوید که شماری از عالمان دین و فعالان مدنی طبق مقرره‌های موجود به عنوان همکاران پولیس در چهار شورای مردمی در ولایت جوزجان فعالیت می‌کنند. او اضافه می‌کند که اعضای شوراهای مشورتی در بخش کشیده‌گی‌های خانواده‌گی و حل اختلاف‌های مردمی در روستاهای این ولایت کار می‌کنند. آقای علمیار علاوه می‌کند که اعضای شوراهای مشورتی در بخش گزارش‌دهی از وضعیت ناامنی و رویدادهای طبیعی نیز فعالیت می‌کنند.

مسوول رسانه‌یی پولیس مردمی فرماندهی پولیس ولایت جوزجان خاطرنشان می‌سازد که موضوع‌های جزایی مانند خشونت‌های فزیکی، ضرب و شتم و دیگر موارد حقوقی مربوط به فرماندهی پولیس ولایت جوزجان و ارگان‌های عدلی و قضایی می‌شود. این مسوول رسانه‌یی پولیس مردمی اعضای شورای مشورتی را به عنوان پولیس بدون یونیفورم توصیف می‌کند. او تأکید می‌کند که آنان در بخش کشیده‌گی‌های خانواده‌گی و اختلاف‌های قومی فعالیت‌های چشم‌گیری دارند.

در همین‌حال، مولوی یارمحمد، یکی از اعضای شورای مردمی پولیس بیان می‌کند که پس از آغاز کار شوراهای مردمی پولیس، مشکلات مدنی باشنده‌گان روستاهای ولایت جوزجان تا ۸۰ درصد در مرکز شوراها حل می‌شوند. او خاطرنشان می‌سازد که با همکاری اعضای دیگر این شورا در سال روان میلادی ۲۸۶ رویداد مدنی مانند اختلاف‌های کوچک قومی و کشیده‌گی‌های خانواده‌‌گی را حل ساخته‌اند. او با ابراز این مطلب اضافه می‌کند که رویدادهای حاد و حادثه‌های جدی را با فرماندهی پولیس ولایت جوزجان در میان می‎‌گذارند. مولوی یارمحمد علاوه می‌کند که همۀ فعالیت‌های آنان به گونۀ رضاکارانه است.

از سوی دیگر، نگیتا ملک، فعال مدنی در ولایت جوزجان فعالیت شوراهای مردمی پولیس را خوب ارزیابی می‌کند و می‌گوید که این شوراها با درنظرداشت قوانین مدنی کشور، نزاع‌های کوچکی را حل می‌کنند. او موجودیت چنین شوراها را به نفع امنیت روستاهای شبرغان می‌داند.

شوراهای مردمی پولیس از سوی فرماندهی امنیۀ ولایت جوزجان در سال ۱۳۹۶ خورشیدی تشکیل شده است. این نهادهای شبۀ قضایی شامل سه شورای مردمی پولیس در شهر شبرغان و یک شورای دیگر در ولسوالی خواجه‌دوکوه ولایت جوزجان است. در حال حاضر حدود ۸۰ تن از عالمان دین، فعالان مدنی به شمول شش زن عضویت این شوراها را دارند.