د بدخشان سیمه‌ییز چارواکي په یفتل پایان ولسوالۍ کې د طالبانو له ډلییزو بریدونو پنځه سوه کورنۍ بېځایه شوې، چې فیض‌اباد ښار او څېرمه ولسوالیو ته تللې دي.
د بدخشان د والي ویاند نېک‌محمد نظري نن (چهارشنبه، د غبرګولي پنځمه) ویلي، چې له څو ورځو راهیسې پر یادې ولسوالۍ د طالبانو بریدونه پیل شوي دي. د هغه په وینا د طالبانو له فشار څخه ۵۰۰ کورنۍ بېځایه شوې‎.
نظري وايي، په جګړه کې دواړو لوریو ته زیان اوښتی. نظري وايي، په دې نښتو کې ۱۵ طالبان وژل شوي او شهربزرګ ولسوالۍ ته د طالبانو نومول شوی ولسوال هم په نښته کې ټپي شوی.
بل خوا طالبانو په یوه خبرپاڼه کې ویلي، چې د یادې ولسوالي درې کلي یې په بشپړه توګه نیولي او امنیتي ځواکونو ته یې د درنو زیانونو تر څنګ د هغوی زیاتې وسلې هم لاسته ورغلې. طالبان وايي، د امنیتي ځواکونو په هوايي بریدونو کې څلور جوماتونه او د اوسېدو کورونه ویجاړ شوي.
د بدخشان د والي ویاند بیا د طالبانو دا تورونه ردوي. هغه همداراز وايي، چې طالبان د عامو وګړو کورونه د سنګر په توګه کاروي.
یفتل پایان فیض‌اباد ښار ته څېرمه ناامنه ولسوالي دي. له څه وخت راپدېخوا د یادې ولسوالۍ ځینې برخه د طالبانو تر واک لاندې دي. د بدخشان سیمه‌ییز چارواکي وايي، چې طالبانو په وروستیو کې په بدخشان کې بریدونه زیات کړي دي.